Սլովակիայի մայրաքաղաք Բրատիսլավայում մեկնարկած ազատ ոճի ըմբշամարտի Եվրոպայի առաջնությունում Արման Անդրեասյանը (70 կգ) դուրս եկավ կիսաեզրափակիչ։
25-ամյա ըմբիշը քառորդ եզրափակիչում 4-0 հաշվով առավելության հասավ ուկրաինացի Ալեքսեյ Բորուտայի դեմ գոտեմարտում։
Կիսաեզրափակիչում Անդրեասյանի մրցակիցը կլինի վրացի Ակակի Կեմերտելիձեն։ Կողմերը գոտեմարտել են նաև Եվրոպայի նախորդ տարվա առաջնության եզրափակիչում. հայ մարզիկը հաղթել է 7-3 հաշվով ու դարձել չեմպիոն։
Հայաստանի ներկայացուցիչներից քառորդ եզրափակիչում պետք է գոտեմարտի նաև Վազգեն Թևանյանը (65 կգ), իսկ Մանվել Խնձրցյանը (57 կգ), Հայկ Պապիկյանը (79 կգ) և Գուրգեն Սիմոնյանը (97 կգ) պարտվել են մեկնարկում։
Եվրոպայի առաջնության վճռորոշ գոտեմարտերը կցուցադրվեն «Ֆասթ Մեդիա»-ի հեռուստաալիքներով ու Fast TV հավելվածում (iOS, Android)։ Ակակի Կեմերտելիձե - Արման Անդրեասյան գոտեմարտը նախնական ժամը 20:42-ից կլինի «Ֆասթ Սպորտ»-ի ուղիղ եթերում:
