Ֆուտբոլի աշխարհի 2026 թվականի առաջնության եվրոպական գոտու ընտրական մրցաշարի F խմբում Պորտուգալիայի հավաքականն ընդունեց Իռլանդիայի ազգային թիմին և ավելացված ժամանակում հաղթանակ կորզեց 1-0 հաշվով:

75-րդ րոպեին 11-մետրանոցից վրիպեց լեգենդար Կրիշտիանու Ռոնալդուն. իռլանդացիների դարպասապահ Կուիվին Կելեհերը ոտքով հեռացրեց գնդակը:

Հիմնական ժամանակին ավելացված առաջին րոպեին «Ալ Հիլալի» կիսապաշտպան Ռուբեն Նևեշը խփեց խաղի միակ գոլը: Սա Նևեշի առաջին գոլն է Պորտուգալիայի հավաքականում անցկացրած 60 խաղում: Ի դեպ, Նևեշը խաղում է «21» համարով, նախկինում խաղային այս համարով հանդես էր գալիս Դիոգու Ժոտան:

Ավելի վաղ այս խմբի մյուս խաղում Հայաստանի ազգային հավաքականը Բուդապեշտի «Պուշկաշ Արենայում» 0-2 հաշվով պարտվել էր Հունգարիայի թիմին:

Այսպիսով՝ Պորտուգալիան 3 խաղից հետո 9 միավորով առաջատարն է, Հունգարիան 4 միավորով երկրորդն է, Հայաստանը` 3 միավորով երրորդը, Իռլանդիան` 1 միավորով չորրորդը:

Հոկտեմբերի 14-ին Հայաստանի հավաքականը կհյուրընկալվի Իռլանդիային, Հունգարիան` Պորտուգալիային:

Պորտուգալիա - Իռլանդիա խաղին զուգահեռ E խմբում հանդիպում անցկացրեց Եվրոպայի չեմպիոն Իսպանիան, որը տանը 2-0 հաշվով հաղթեց Վրաստանին, I խմբում Իտալիան հյուրընկալվելիս 3-1 հաշվով առավելության հասավ Էստոնիայի թիմի դեմ պայքարում: 

ԱԱ-2026, եվրոպական գոտու ընտրական մրցաշար

F խումբ

Պորտուգալիա - Իռլանդիա` 1-0

Ռուբեն Նևեշ, 90+1

Չիրացված 11-մետրանոց` Կրիշտիանու Ռոնալդու, 75 (Պորտուգալիա)

E խումբ

Իսպանիա - Վրաստան` 2-0

Յերեմի Պինո, 24, Միկել Օյարսաբալ, 64

Չիրացված 11-մետրանոց` Ֆերան Տոռես, 29 (Իսպանիա)

Բուլղարիա - Թուրքիա` 1-6

Ռադոսլավ Կիրիլով, 13 - Արդա Գյուլեր, 11, Վիկտոր Պոպով, 49 (ինքնագոլ), Քենան Յիլդիզ, 51, 56, Զեկի Չելիկ, 65, Իրֆան Քան Կահվեչի, 90+3

I խումբ

Էստոնիա - Իտալիա` 1-3

Ռաունո Սապինեն, 76 - Մոյզե Քին, 4, Մատեո Ռետեգի, 38, Պիո Էսպոսիտո, 74

Չիրացված 11-մետրանոց` Մատեո Ռետեգի, 30 (Իտալիա)

K խումբ

Սերբիա - Ալբանիա` 0-1

Ռեյ Մանայ, 45+1

Լատվիա - Անդորրա` 2-2

ԱԱ-2026-ի եվրոպական գոտու ընտրական մրցաշարի հանդիպումները ցուցադրվում են «Ֆասթ Սպորտ» հեռուստաալիքների («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ուղիղ եթերում: Բոլոր խաղերը հեռարձակվում են Fast TV հավելվածում (iOS, Android):