Fastex Պրեմիեր լիգայի աշնանային հատվածի 74 հանդիպումներում 10 թիմերի կազմում ընդհանուր առմամբ խաղադաշտ են դուրս եկել 258 ֆուտբոլիստներ, որոնցից 133-ն (51,5 տոկոսը) ազգությամբ հայ են: 133 հայ ֆուտբոլիստներից 94-ը մասնակցել են հանդիպումների 30 տոկոսից ավելիին՝ ստանալով բավարար խաղաժամանակ: Իսկ հայ ֆուտբոլիստներից 39-ը 1-5 խաղի է մասնակցել:
29 ֆուտբոլիստներ մասնակցել են իրենց թիմերի անցկացրած բոլոր հանդիպումներին: Նրանցից միայն 3-ը՝ ալաշկերտցիներ Արսեն Բեգլարյանն ու Կլայդեր Մասեդոն և շիրակցի Համլետ Մնացականյանն են բոլոր խաղերին մասնակցել առանց փոխարինման:
Ամենակայուն կազմով աչքի է ընկել «Ալաշկերտը»՝ խաղադաշտ դուրս բերելով 22 ֆուտբոլիստի: «Փյունիկում» հանդես են եկել 23 ֆուտբոլիստներ, «Արարատ-Արմենիայում» և ԲԿՄԱ-ում՝ 24-ական: Առավել շատ՝ 31 ֆուտբոլիստների է ասպարեզ դուրս բերել առաջնության հետնապահ «Արարատը», «Նոայում» և «Վանում» խաղացել են 28-ական ֆուտբոլիստներ:
Հայ ֆուտբոլիստների քանակով մրցակցությունից դուրս է ամբողջությամբ հայերով համալրված ԲԿՄԱ-ն, որում արգելված են լեգեոնականների ընդգրկումը: Թիմում հանդես եկած 24 ֆուտբոլիստներից միայն 6-ը բավարար խաղաժամանակ չեն ստացել՝ մասնակցելով 1-5 խաղի:
Մնացած 9 թիմերում հայերի ընդհանուր թիվը 109 է: Նրանցից 33-ն առաջնությունում մասնակցել են 1-5 խաղի: Ստացվում է, որ 9 թիմերի կազմերում բավարար խաղաժամանակ են ստացել ընդամենը 76 հայ ֆուտբոլիստներ, ինչը չի կարող գոհացուցիչ լինել:
ԲԿՄԱ-ից հետո ամենամեծ թվով հայ ֆուտբոլիստներ (22) հանդես են եկել «Շիրակում»: Նրանցից 16-ը բավարար խաղաժամանակ է ստացել: «Շիրակում» ամենաքիչ թվով այլազգի ֆուտբոլիստներ են խաղացել՝ ընդամենը 3-ը (Ալեքսա Վիդիչ, Դոնալդ Կոդիա, Ջեսի Ակիլա):
«Շիրակից» բացի, «Ուրարտուի» և «Գանձասարի» կազմերում էլ հայ ֆուտբոլիստներն իրենց քանակով գերազանցում են լեգեոնականներին: Ռոբերտ Արզումանյանի գլխավորած թիմում խաղադաշտ դուրս եկած 26 ֆուտբոլիստներից 15-ը հայ են, որոնցից 12-ը բավարար խաղաժամանակ է ստացել: 27 գանձասարցիներից 14-ն են հայ, որոնցից 9-ը բավարար խաղաժամանակ է ստացել:
Ամենաքիչ թվով հայ ֆուտբոլիստներ հանդես են եկել «Փյունիկում» և «Նոայում»: Խաղադաշտ դուրս եկած 23 փյունիկցիներից միայն 7-ն են հայ (30,4 տոկոսը), որոնցից 6-ը բավարար խաղաժամանակ է ստացել: Հայաստանի գործող չեմպիոնի կազմում ասպարեզ դուրս եկած 28 ֆուտբոլիստներից միայն 8-ն են հայ (28,5 տոկոսը), որոնցից 5-ն է բավարար խաղաժամանակ ստացել:
Այլազգի ֆուտբոլիստների քանակով (20) ռեկորդակիրը «Նոան» է: «Արարատում» հանդես են եկել 19 լեգեոնականներ: 28 ֆուտբոլիստ խաղադաշտ դուրս բերած «Վանում» 17 այլազգի ֆուտբոլիստ է խաղացել, «Փյունիկում» նրանց թիվը 16 է:
FastNews-ը ներկայացնում է Fastex Պրեմիեր լիգայի աշնանային հատվածում մասնակից թիմերում հանդես եկած ֆուտբոլիստների ընդհանուր քանակը, ինչպես նաև հայ և այլազգի խաղացողների թիվը: Փակագծում նշված է, թե հայ ֆուտբոլիստներից քանիսն են բավարար խաղաժամանակ ստացել:
|
Թիմեր |
Ֆուտբոլիստներ |
Հայ |
Այլազգի |
|
1. ԲԿՄԱ |
24 |
24 18) |
- |
|
2. «Շիրակ» |
25 |
22 (16) |
3 |
|
3. «Ուրարտու» |
26 |
15 (12) |
11 |
|
4. «Գանձասար» |
27 |
14 (9) |
13 |
|
5. «Արարատ» |
31 |
12 (6) |
19 |
|
6. «Արարատ-Արմենիա» |
24 |
11 (8) |
13 |
|
7. «Վան» |
28 |
11 (6) |
17 |
|
8. «Ալաշկերտ» |
22 |
9 (8) |
13 |
|
9. «Նոա» |
28 |
8 (5) |
20 |
|
10. «Փյունիկ» |
23 |
7(6) |
16 |
