Ռուսական «Կրասնոդարի» և Հայաստանի հավաքականի կիսապաշտպան Էդուարդ Սպերցյանը կարող է կարիերան շարունակել իսպանական Լա լիգան ներկայացնող «Ժիրոնայում»։
Ֆուտբոլային ինսայդեր Իվան Կարպովը սոցցանցերում գրել է, որ կատալոնական ակումբը 24-ամյա ֆուտբոլիստի տրանսֆերի վերաբերյալ առաջարկ է արել «Կրասնոդարին»։ Աղբյուրը հավանական տեղափոխության ֆինանսական մանրամասները չի հաղորդում։
Ավելի վաղ Sport.es պարբերականը գրել էր, որ «Ժիրոնան» կրկին հետաքրքրված է հայ ֆուտբոլիստի ծառայություններով։ Միչելի գլխավորած թիմը Սպերցյանին դիտարկում է` որպես թիմի նախկին ավագ Ալեիշ Գարսիայի փոխարինողի։ Գարսիան կարիերան շարունակելու է Լևերկուզենի «Բայերում»։
Էդուարդ Սպերցյանը 2023/24 մրցաշրջանում «Կրասնոդարի» կազմում մասնակցել է 33 հանդիպման, դարձել 11 գոլի և 7 գոլային փոխանցման հեղինակ:
Հիշեցնենք, որ «Ժիրոնան» ավարտված մրցաշրջանում Լա լիգայում գրավել է երրորդ տեղը և սեպտեմբերից պատմության մեջ առաջին անգամ խաղալու է Չեմպիոնների լիգայում:
