Ալբանիայի մայրաքաղաք Տիրանայում մեկնարկած ազատ ոճի ըմբշամարտի Եվրոպայի Մ23 առաջնության առաջին մրցումային օրը գորգ դուրս եկած Հայաստանի ներկայացուցիչներից պայքարը կշարունակեն Հայկ Աբրահամյանը (65 կգ) և Սերգեյ Սարգսյանը (97 կգ):
Աբրահամյանը պայքարը սկսել է 1/8 եզրափակիչից, որտեղ 2-7 հաշվով պարտվել է թուրք Աբդուլա Թոփրակին: Վերջինը հասել է եզրափակիչ, և Աբրահամյանը սփոփիչ գոտեմարտ կանցկացնի բելառուս Անատոլի Հրամիկի հետ: Հայ ըմբիշը հաղթելու դեպքում կգոտեմարտի բրոնզե մեդալի համար:
Սերգեյ Սարգսյանն էլ որակավորման փուլում 11-3 հաշվով հաղթել է ադրբեջանցի Աբդուլջալիլ Շաբանովին, հաջորդ գոտեմարտում 0-12 հաշվով պարտվել է Բելառուսի ներկայացուցիչ Ուլադզիզլաու Կազլուին: Սարգսյանին հաղթած ըմբիշը հասել է եզրափակիչ, և Հայաստանի ներկայացուցիչը սփոփիչ գոտեմարտում կմրցի հույն Նիկոլաոս Կարավանոսի դեմ:
