ՈւԵՖԱ-ն հաստատել է ֆուտբոլի 2026թ․ աշխարհի առաջնության եվրոպական գոտու ընտրական մրցաշարի ձևաչափը, հայտնում է կառույցի մամուլի ծառայությունը:
Աշխարհի առաջնությանը կմասնակցեն 16 եվրոպական հավաքականներ։ Որակավորման փուլի մասնակիցները կբաժանվեն 12 խմբերի, որոնցում կլինեն չորս կամ 5 հավաքականներ: Խմբերի հաղթողները կնվաճեն աշխարհի առաջնության եզրափակիչ մրցաշարի ուղեգիր։ Խմբերում երկրորդ տեղը զբաղեցրած հավաքականները որակավորման փուլի փլեյ-օֆֆում կպայքարեն մյուս ուղեգրերի համար:
Բացի խմբերում երկրորդ տեղը գրաված 12 հավաքականներից, որակավորման փուլի փլեյ-օֆֆին կմասնակցեն նաև Ազգերի լիգայի 2024/2025թթ. խաղարկությունում լավագույն արդյունքը գրանցած չորս հավաքականները, որոնք ընտրական փուլի իրենց խմբերում առաջին կամ երկրորդ տեղը գրաված չեն լինի:
Ընտրական փուլի փլեյ-օֆֆի դիմակայությունները բաղկացած կլինեն մեկական խաղից:
Հիշեցնենք, որ ԱԱ-2026-ը կանցկացվի ԱՄՆ-ում, Մեքսիկայում և Կանադայում: Առաջին անգամ Մունդիալին կմասնակցեն 48 երկրների ազգային հավաքականներ:
