Բասկետբոլի ազգային ասոցիացիայում (NBA) կայացել է «Մինեսոտա» – «Ինդիանա» հանդիպումը, որն ավարտվել է հյուրերի հաղթանակով՝ 132:130: Հիմնական ժամանակն ավարտվել է ոչ-ոքի արդյունքով, իսկ լրացուցիչ ժամանակի ավարտից 3,5 վայրկյան առաջ Օբի Թոփինը ձախ եզրից շատ բարդ 3-միավորանոց է իրացրել:
Վերջին գրոհը «Թիմբերվուլվզինն» է եղել, սակայն Ջուլիուս Ռենդլը չի կարողացել հավասարեցնել հաշիվը:
«Ինդիանան» խաղացել է առանց իր առաջատար Թայրիզ Հալիբըրթոնի և հաղթանակի շնորհիվ հավասարվել է Արևելյան կոնֆերենցիայի 4-րդ տեղում ընթացող «Միլուոկի Բաքսին»:
«Մինեսոտան» մինչև այդ 8 անընդմեջ հաղթանակ էր գրանցել: Եթե Քրիս Ֆինչի թիմը հաղթեր նաև այսօր, ապա կբարձրանար փլեյ-օֆֆի գոտի: Այժմ «Գայլերն» Արևմուտքում 7-րդ տեղում են:
