FastNews-ը շարունակում է Fastex Պրեմիեր լիգայի 33-րդ առաջնությունում մասնակից թիմերի ելույթների ամփոփումը: Այսօր կանդրադառնանք «Փյունիկին»:  

1. Անկախության շրջանի հայկական ֆուտբոլի ամենատիտղոսակիր թիմը վերջին 4 մրցաշրջաններում առաջին անգամ առանց մեդալների մնաց: Նախորդ 3 առաջնություններում փյունիկցիները Եղիշե Մելիքյանի գլխավորությամբ 2 անգամ (2021/22, 2023/24թթ.) չեմպիոն են դարձել, մեկ անգամ (2022/23թթ.) արժանացել են արծաթե մեդալների: 

Fastex Պրեմիեր լիգայի 33-րդ առաջնությունը «Փյունիկն» ավարտեց 4-րդ հորիզոնականում՝ 30 հանդիպումներում վաստակելով 53 միավոր (17 հաղթանակ, 2 ոչ-ոքի, 11 պարտություն, խփած և բաց թողած գոլեր՝ 59-37), ինչը հնարավոր միավորների 58,8 տոկոսն է:

Ընդ որում նոյեմբերի 21-ին «Վեստ Արմենիայի» հետ նշանակված խաղը չի կայացել: Մրցակիցը հանդիպմանը չի ներկայացել, ուստի «Փյունիկին» 3-0 հաշվով տեխնիկական հաղթանակ է գրանցվել:

«Փյունիկն» անհավասարաչափ ելույթներ ունեցավ առաջնությունում: Աշնանային հատվածի17 հանդիպումներում գործող չեմպիոնը վաստակեց 37 միավոր (12 հաղթանակ, 1 ոչ-ոքի, 4 պարտություն, խփած և բաց թողած գոլեր՝ 33-13), ինչը հնարավոր միավորների 72,5 տոկոսն է: 3-րդ տեղում ընթացող «Փյունիկը» 3 միավորով հետ մնաց առաջատար «Նոայից», որը մեկ խաղ էլ պակաս էր անցկացրել:

Իսկ ահա գարնանային հատվածում փյունիկցիները շատ անհաջող խաղացին՝ 13 հանդիպումներում վաստակելով ընդամենը 16 միավոր (5 հաղթանակ, 1 ոչ-ոքի, 7 պարտություն, խփած և բաց թողած գոլեր՝ 26-24), ինչը հնարավոր միավորների 41 տոկոսն է:

 

2. Սեփական դաշտում նախատեսված 15 հանդիպումներում «Փյունիկը» վաստակեց 25 միավոր (8 հաղթանակ, 1 ոչ-ոքի, 6 պարտություն, խփած և բաց թողած գոլեր՝ 30-21), ինչը հնարավոր միավորների 55,5 տոկոսն է: Հաղթանակներից մեկը գրանցվել է «Վեստ Արմենիայի» հետ չկայացած խաղում:

«Փյունիկը» սեփական դաշտում պարտվեց «Ալաշկերտին» (0-2), «Նոային» (1-3), «Արարատ-Արմենիային» (1-2), «Ուրարտուին» (0-3, 1-4) և ԲԿՄԱ-ին (1-2):

Հյուրընկալվելիս Եղիշե Մելիքյանի գլխավորած թիմի օգտին անցկացրած 15 հանդիպումներում 28 միավոր գրանցվեց (9 հաղթանակ, 1 ոչ-ոքի, 5 պարտություն, խփած և բաց թողած գոլեր՝ 29-16), ինչը հնարավոր միավորների 62,2 տոկոսն է:

Մրցակցի դաշտում «Փյունիկը» հաղթել է «Վեստ Արմենիային» (3-1, 1-0), «Արարատ-Արմենիային» (3-1), «Վանին» (3-1), ԲԿՄԱ-ին (2-1), «Արարատին» (2-0), «Գանձասարին» (5-0, 3-1), «Ալաշկերտին» (2-0):

3. «Փյունիկը» շատ անհաջող սկսեց առաջնությունը՝ մեկնարկային 2 հանդիպումներում վաստակելով ընդամենը մեկ միավոր, չգտնելով մրցակիցների դարպասի բանալին:

Հետագայում փյունիկցիները բարելավեցին ցուցանիշները: Գործող չեմպիոնը 7 անընդմեջ հաղթանակ տոնեց: Միայն 5 խաղում «Փյունիկին» չհաջողվեց գրավել մրցակիցների դարպասը: Իսկ սեփական դարպասը «Փյունիկը» 9 անգամ անառիկ պահեց:

«Փյունիկն» առաջնությունում խոշոր հաշվով 5 հաղթանակ տոնեց (ԲԿՄԱ՝ 4-1, «Արարատ»՝ 3-0, 5-2, «Գանձասար»՝ 5-0, «Շիրակ»՝ 6-1): Թիմն այդ կարգի 2 պարտություն կրեց («Ուրարտու»՝ 0-3, 1-4):

 

4. «Փյունիկի» մասնակցությամբ հանդիպումներում նշանակվել է 11մ 16 հարված, որից իրացվել է 13-ը: Հայաստանի բազմակի չեմպիոնի օգտին առաջնության մասնակից թիմերից բոլորից շատ՝ 11 11մ հարված է նշանակվել, որից իրացվել է 10-ը:

Յուսուֆ Օտուբանջոն առավել հաճախ՝ 5 անգամ է 11մ հարված կատարել: Նրա հարվածներից 4-ն ավարտվել են Արման Ներսեսյանի (ԲԿՄԱ), Արսեն Բեգլարյանի («Արարատ-Արմենիա»), Տիգրան Ոփանյանի («Գանձասար») և Հենրի Ավագյանի («Արարատ-Արմենիա») պաշտպանած դարպասների գրավմամբ, իսկ «Վանի» դարպասապահ Դանիիլ Պոլյանսկին հետ է մղել գնդակը:

Էդգար Մալաքյանը դիպուկ է իրացրել իրեն վստահված 3 հարվածներն էլ՝ հաղթող դուրս գալով Օգնյեն Չանչարևիչի («Նոա»), Հենրի Ավագյանի («Արարատ-Արմենիա») և արարատցի Անդրանիկ Մարտիրոսյանի հետ մենամարտերում:

Սերժ Դեբլեն 11մ նշակետից խոցել է արարատցի Տիագո Գոմեսի և գանձասարցի Տիգրան Ոփանյանի պաշտպանած դարպասները: Եվգենի Կոչուկն էլ գրավել է շիրակցի Դարկո Վուկաշինովիչի պաշտպանած դարպասը:

«Փյունիկի» դարպասին նշանակված 11մ 5 հարվածներից 3-ն է նպատակին հասել: «Փյունիկում» խաղալիս Հենրի Ավագյանը հետ է մղել բանակային Նարեկ Հովհաննիսյանի հարվածը, Ստանիսլավ Բուչնևն էլ հաղթող է դուրս եկել ալաշկերտցի Ժոզե Էմբալուի հետ մենամարտում:

«Արարատ-Արմենիայի» կիսապաշտպան Տենտոն Յենեն գրավել է Հենրի Ավագյանի պաշտպանած դարպասը: Բրունո Միշելը («Ուրարտու») և «Արարատ-Արմենիայի» hարձակվող Մարիուս Նուբիսին հաղթող են դուրս եկել Ստանիսլավ Բուչնևի հետ մենամարտերում:

5. Արդյունավետությամբ «Փյունիկը» զիջեց առաջնության առաջատար եռյակին: Խփած 56 գոլերի հեղինակներ դարձան 16 փյունիկցիներ, որոնցից միայն 3-ն են հայ: Եվգենի Կոչուկը, Արտակ Գրիգորյանը, Սանի Բուհարին, Ագդոն Մենեզեսը, Ժոել Բոպեսուն, Մատաս Վարեյկան, Դանիիլ Կուլիկովը և Թեմուր Ջիկիան բացեցին գոլերի հաշիվը «Փյունիկում»:

3-րդ մրցաշրջանն անընդմեջ Յուսուֆ Օտուբանջոն դարձավ «Փյունիկում» ամենաարդյունավետը՝ խփելով 14 գոլ: Թիմի կազմում իր նորամուտի մրցաշրջանում նիգերիացի հարձակվողը Լուկա Յուրիչիչի հետ 17 գոլով ճանաչվել էր ոչ միայն «Փյունիկի», այլև 2022/23թթ. առաջնության լավագույն ռմբարկու: Նախորդ առաջնությունում Օտուբանջոյի հաշվին 21 գոլ էր գրանցվել:

Ընդհանուր առմամբ Օտուբանջոն «Փյունիկում» Fastex Պրեմիեր լիգայում 52 գոլ է խփել և ակումբի պատմության լավագույն ռմբարկուների ցանկում 6-րդ տեղում է: Նա «Փյունիկի» պատմության ամենաարդյունավետ այլազգի ֆուտբոլիստն է:

«Փյունիկի» նիգերիացի հարձակվողը պատմական երկու ռեկորդ սահմանեց: Հայաստանի առաջնություններում խփած 79 գոլով Օտուբանջոն դարձավ ամենաարդյունավետ այլազգի ֆուտբոլիստը՝ 4 գնդակով գերազանցելով բրազիլացի Մարկոս Պիզելիի ռեկորդային ցուցանիշը:

Ակումբային բոլոր մրցաշարերում խփած գոլերի ընդհանուր քանակով էլ (89) Օտուբանջոն գերազանցեց Մարկոս Պիզելիի ռեկորդային ցուցանիշը (86 գոլ):

6. Արտակ Գրիգորյանը բացելով գոլերի հաշիվը «Փյունիկում», դարձավ առաջնության աշնանային հատվածում գոլ խփած ամենատարեց ֆուտբոլիստը: Նոյեմբերի 7-ին նա «Գանձասարի» դարպասը գրավել էր 37 տարեկան 19 օրականում: Գրիգորյանն ընդգրկվեց Fastex Պրեմիեր լիգայում «Փյունիկում» գոլ խփած ամենատարեց ֆուտբոլիստների եռյակում:

Ցանկը գլխավորում է Սարգիս Հովսեփյանը (39 տարեկան 281 օրական), որին հաջորդում է Խորեն Հովհաննիսյանը (38 տարեկան 154 օրական):

Էդգար Մալաքյանը 34 տարեկան 237 օրականում 11մ հարվածով գրավելով «Արարատի» դարպասը, ընդգրկվեց Fastex Պրեմիեր լիգայում «Փյունիկում» գոլ խփած ամենատարեց ֆուտբոլիստների տասնյակում՝ ցանկից դուրս մղելով Համլետ Մխիթարյանին (33 տարեկան 219 օրական):

36-ամյա Սերժ Դեբլեն 2025թ. օրացուցային տարում առաջնությունում խփած 4 գոլով արդյունավետության տարիքային նոր ռեկորդ սահմանեց՝ գերազանցելով Սարգիս Հովսեփյանի ցուցանիշը: Վերջինս այդ տարիքում «Փյունիկում» բոլորից շատ՝ 3 գոլ էր խփել: Դեբլեն ընդգրկվեց «Փյունիկում» խաղացած ամենատարեց ֆուտբոլիստների տասնյակում (35 տարեկան 234  օրական): Նա ցանկից դուրս թողեց Անտոն Կոբյալկոյին (34 տարեկան 357 օրական): 

Սանի Բուհարին (20 տարեկան 262 օրական) ընդգրկվեց Fastex Պրեմիեր լիգայում «Փյունիկում» գոլ խփած ամենաերիտասարդ լեգեոնականների տասնյակում:

7. Առաջնության աշնանային հատվածում «Փյունիկի» դարպասի պաշտպանությունը վստահվել էր երկու դարպասապահի: Հիմնական ծանրաբեռնվածությունն իր ուսերին տարավ Հենրի Ավագյանը՝ անցկացրած 12 խաղում բաց թողնելով 9 գոլ (միջինը մեկ խաղում՝ 0,75 գոլ), 6 խաղում դարպասը պահելով անառիկ: Նա 3 խաղ անընդմեջ, 364 րոպե շարունակ գոլ բաց չթողեց:

Ձմռանն Ավագյանը տեղափոխվեց «Արարատ-Արմենիա», իսկ Ստանիսլավ Բուչնևը կրկին իր հաստատուն տեղը զբաղեցրեց դարպասում: Նա անցկացրած 16  խաղում 25 գոլ բաց թողեց (միջինը մեկ խաղում՝ 1,56 գոլ), 3 խաղում դարպասն անառիկ պահեց:

«Վանի» հետ առաջնության ավարտական խաղում (2-3) «Փյունիկի» դարպասը պաշտպանեց Սերգեյ Միքայելյանը, որը մինչև այդ 2022/23թթ. էր մեկ խաղ անցկացրել թիմի կազմում:

8. Առաջնությունում «Փյունիկում» ելույթ ունեցած ամենատարեց ֆուտբոլիստը 37-ամյա Արտակ Գրիգորյանն էր: Դեկտեմբերի 2-ին «Գանձասարի» հետ մրցավեճը Fastex Պրեմիեր լիգայում վերջին՝ 404-րդ խաղն էր ֆուտբոլային կարիերան ավարտած փորձառու ֆուտբոլիստի համար: Խաղի օրը Գրիգորյանը 37 տարեկան 44 օրական էր: Նա ընդգրկվեց Fastex Պրեմիեր լիգայում «Փյունիկում» խաղացած ամենատարեց ֆուտբոլիստների եռյակում:

Ցանկը գլխավորում է Խորեն Հովհաննիսյանը (40 տարեկան 298 օրական), որին հաջորդում է Սարգիս Հովսեփյանը (39 տարեկան 318 օրական):

Արտակ Գրիգորյանը ֆուտբոլային իր հարուստ կարիերան ավարտեց պատմական նվաճմամբ՝ դառնալով 21-րդ դարում Fastex Պրեմիեր լիգայում 400 և ավելի խաղ անցկացրած առաջին ֆուտբոլիստը:  

9. «Փյունիկում» ամենաերիտասարդը 16-ամյա Ժիրայր Աշիկյանն էր: Եղիշե Մելիքյանը հիանալի նվեր մատուցեց պատանի ֆուտբոլիստին՝  ծննդյան օրը՝ նոյեմբերի 7-ին նրան խաղադաշտ դուրս բերելով «Գանձասարի» հետ մրցավեճում: Հատկանշական է նաև, որ Աշիկյանը 73-րդ րոպեին փոխարինել էր թիմի ամենափորձառու ֆուտբոլիստ Արտակ Գրիգորյանին՝ նրանից ստանալով ավագի թևկապը:

Աշիկյանն ընդգրկվեց Fastex Պրեմիեր լիգայում «Փյունիկում» հանդես եկած ամենաերիտասարդ ֆուտբոլիստների տասնյակում: Ցանկը գլխավորում է Խորեն Հովհաննիսյանի որդին՝ Ժորան, որը 2002թ. թիմի կազմում նորամուտը նշել էր 15 տարեկան 18 օրականում:

Բարձրագույն խմբում «Փյունիկում» անցկացրած խաղերի ընդհանուր քանակով (170) թիմի ներկայիս կազմից ամենափորձառուն 34-ամյա Էդգար Մալաքյանն էր, որը նախորդ մրցաշրջանում երկարատև ընդմիջումից հետո վերադարձել էր հարազատ ակումբ, որում սկսել էր պրոֆեսիոնալ ֆուտբոլիստի կարիերան: Նա թիմի ամենափորձառու ֆուտբոլիստների ցանկում զբաղեցնում է 7-րդ տեղը:

160 խաղով այդ ցանկում 8-րդը Տարոն Ոսկանյանն է, որի համար դեկտեմբերի 2-ին «Գանձասարի» հետ կայացած խաղը հոբելյանական՝ 300-րդն էր Fastex Պրեմիեր լիգայում: 31-ամյա Ոսկանյանը «Փյունիկում» անցկացրած խաղերի ընդհանուր քանակով տարիքային նոր ռեկորդ սահմանեց՝ գերազանցելով թիմի նախկին պաշտպան Արթուր Մկրտչյանի 20-ամյա վաղեմության լավագույն ցուցանիշը: Վերջինս այդ տարիքում թիմի կազմում բոլորից շատ՝ 145 խաղ էր անցկացրել:

Ձմռանը Մալաքյանի օրինակին հետևած Վարազդատ Հարոյանը Fastex Պրեմիեր լիգայում «Փյունիկում» անցկացրած խաղերի ընդհանուր քանակով (156) եզրափակում է թիմի ամենափորձառու ֆուտբոլիստների տասնյակը:

10. Առաջնության աշնանային հատվածում Եղիշե Մելիքյանը խաղադաշտ դուրս բերեց 41 ֆուտբոլիստների, որոնցից 24-ն այլազգի էին: Ֆուտբոլիստների ընդհանուր քանակով «Փյունիկը» զիջեց միայն «Գանձասարին», իսկ լեգեոնականների թվով ռեկորդակիր է առաջնության մասնակից թիմերի մեջ: Ընդ որում 17 հայ ֆուտբոլիստներից միայն 6-ն են բավարար խաղաժամանակ ստացել, մյուսները 1-9 խաղի են մասնակցել:

16 ֆուտբոլիստներ՝ Ալեմաոն, Մարտիմ Մայան, Բրայան Ալսեուսը, Սանի Բուհարին, Ագդոն Մենեզեսը, Ժոաո Պարեդեսը, Իշխան Դարբինյանը, Արթուր Մանուկյանը, Համլետ Ալեքսանյանը, Սամսոն Հակոբյանը, Ժիրայր Աշիկյանը, Ժոել Բոպեսուն, Մատաս Վարեյկան, Միմիտոն, Դանիիլ Կուլիկովը և Թեմուր Ջիկիան  նորամուտը նշեցին «Փյունիկում»:

Փյունիկցիները 60 անգամ զգուշացվել են, Խամես Սանթոսն ու Բրայան Ալսեուսն էլ մեկական անգամ հեռացվել են խաղադաշտից: Առավել հաճախ՝ 7 անգամ դեղին քարտի է արժանացել Միխայիլ Կովալենկոն:

FastNews-ը ներկայացնում է «Փյունիկի» ֆուտբոլիստների ցուցանիշները Fastex Պրեմիեր լիգայի 33-րդ առաջնությունում:

Ֆուտբոլիստներ	Խաղ	Գոլ	Զ (Հ)
1. Սանի Բուհարի	27	3	3
2. Յուսուֆ Օտուբանջո	25	14	5
3. Տարոն Ոսկանյան	24	1	1
4. Սոլոմոն Իմե Ուդո	23	-	4
5. Ալեմաո	23	-	3
6. Սերժ Դեբլե	22	9	1
7. Ագդոն Մենեզես	22	6	5
8. Միխայիլ Կովալենկո	22	2	7
9. Էդգար Մալաքյան	21	3	2
10. Անտոն Բրատկով	18	-	3
11. Բրայան Ալսեուս	17	-	2 (1)
12. Ստանիսլավ Բուչնև	16	-25	-
13. Դավիդ Դավիդյան	16	-	4
14. Սերգեյ Վակուլենկո	15	-	4
15. Խամես Սանթոս	12	2	3 (1)
16. Հենրի Ավագյան	12	-9	-
17. Վագներ Գոնսալվեշ	12	-	1
18. Մատաս Վարեյկա	11	7	1
19. Ժունինյո	11	1	1
20. Արտակ Գրիգորյան	11	1	2
21. Ժոել Բոպեսու	10	2	2
22. Խոսե Կառաբալյո	10	1	1
23. Դանիիլ Կուլիկով	10	1	2
24. Վարազդատ Հարոյան	10	-	2
25. Թեմուր Ջիկիա	9	1	1
26. Լևոն Պետրոսյան	9	-	-
27. Արման Հովհաննիսյան	8	-	-
28. Մարտիմ Մայա	7	-	-
29. Ժոաո Պարեդես	6	-	-
30. Միմիտո	4	-	-
31. Խուան Բրավո	4	-	-
32. Արթուր Գրիգորյան	4	-	-
33. Եվգենի Կոչուկ	2	1	-
34. Պետրոս Ալեքյան	1	-	-
35. Նարեկ Բարոյան	1	-	-
36. Իշխան Դարբինյան	1	-	-
37. Արթուր Մանուկյան	1	-	-
38. Համլետ Ալեքսանյան	1	-	-
39. Սամսոն Հակոբյան	1	-	-
40. Ժիրայր Աշիկյան	1	-	-
41. Սերգեյ Միքայելյան	1	-3	-