Վրաստանի դեմ Ազգերի լիգայի խաղարկության անցումային փլեյ-օֆֆի խաղում (0-3) Վարազդատ Հարոյանը Հայաստանի ազգային հավաքականի կազմում 90-րդ անգամ խաղադաշտ դուրս եկավ: Հավաքականի 33-ամյա ավագն անցկացրած խաղերի քանակով տարիքային նոր ռեկորդ սահմանեց՝ գերազանցելով Սարգիս Հովսեփյանի 20-ամյա վաղեմության ցուցանիշը: Վերջինս այդ տարիքում Հայաստանի ազգային հավաքականում 77 խաղ էր անցկացրել:

Այնպես որ Վարազդատ Հարոյանն իր ներկայիս տեմպերով զգալիորեն գերազանցում է հավաքականում անցկացրած խաղերի քանակով ռեկորդակիր Սարգիս Հովսեփյանին, ուստի բոլոր հնարավորություններն ունի ոչ միայն հատելու 100 խաղի սահմանը, այլև գերազանցելու նրա ռեկորդային ցուցանիշը:

Իսկ առայժմ Հարոյանը հավաքականի ամենափորձառու ֆուտբոլիստների ցանկում 4-րդ տեղում է: 132 խաղով ցանկը գլխավորում է Սարգիս Հովսեփյանը, որին հաջորդում են Հենրիխ Մխիթարյանն (95) և Ռոման Բերեզովսկին (94):

Ի դեպ, Վարազդատ Հարոյանն Ազգերի լիգայի խաղարկություններում անցկացրած խաղերի քանակով (22) Հայաստանի ազգային հավաքականի ռեկորդակիրն է: 20-ական խաղ նա անցկացրել է աշխարհի և Եվրոպայի առաջնությունների ընտրական մրցաշարերում, 28 անգամ էլ խաղադաշտ է դուրս եկել հավաքականի ընկերական հանդիպումներում:

Հարոյանի նորամուտը հավաքականում տեղի է ունեցել է 2011թ. օգոստոսի 10-ին Լիտվայի ազգային թիմի հետ Կաունասում կայացած ընկերական խաղում, որում լիտվացիները հաղթել էին 3-0 հաշվով: Հավաքականի գլխավոր մարզիչ Վարդան Մինասյանը 18-ամյա պատանի ֆուտբոլիստին ընդգրկել էր մեկնարկային կազմում: Հարոյանի համար նորամուտն անհաջող դասավորվեց: Երկրորդ խաղակեսի սկզբում նա ընդամենը 9 րոպեում 2 անգամ զգուշացվեց և 59-րդ րոպեին հեռացվեց խաղադաշտից:  

Պաշտոնական առաջին խաղը հավաքականում Հարոյանն անցկացրել է 2013թ. հունիսի 11-ին Դանիայի հետ Կոպենհագենում կայացած աշխարհի առաջնության ընտրական հանդիպման ժամանակ, որում մեր ազգային թիմը 4-0 խոշոր հաշվով ջախջախել էր մրցակցին:

Անցկացրած 90 հանդիպումներից 32-ում Հարոյանն ավագի թևկապով իր խաղընկերներին խաղադաշտ է դուրս բերել: Այդ ցուցանիշով նա զիջում է միայն Սարգիս Հովսեփյանին (74 խաղ) ու Հենրիխ Մխիթարյանին (44): Առաջին անգամ նա հավաքականի ավագի պարտականությունները կատարել է 2020թ. սեպտեմբերի 5-ին Հյուսիսային Մակեդոնիայի հետ Սկոպյեում կայացած Ազգերի լիգայի խաղում, որում մեր ֆուտբոլիստները պարտվել են 1-2 հաշվով:

Հենրիխ Մխիթարյանի բացակայության պայմաններում Հարոյանը ևս 5 խաղում եղել է հավաքականի ավագը, իսկ 2022թ. արդեն մշտապես կրել է ավագի թևկապը (բացառությամբ 2023թ. հունիսի 16-ին Կարդիֆում Ուելսի հետ խաղի, որում փոխարինման է մտել):

Հարոյանը բացի իր հիմնական պարտականությունների կատարումից, հաջողությամբ է միացել հավաքականի գրոհներին՝ 4 անգամ գրավելով մրցակիցների դարպասը: Հավաքականում նա գոլերի հաշիվը բացել է 2016թ. նոյեմբերի 11-ին Չեռնոգորիայի հետ Երևանում կայացած աշխարհի առաջնության ընտրական մրցախաղում՝ նպաստելով 3-2 հաշվով տարած հաղթանակին: Հետագայում Հարոյանը գրավել է Կիպրոսի (Ը), Ռումինիայի (ԱԱ) և Սլովենիայի (Ը) հավաքականների դարպասը:

FastNews-ը ներկայացնում է Հայաստանի ազգային հավաքականի կազմում անցկացրած խաղերի քանակով ֆուտբոլիստների տարիքային ռեկորդները: