Անգլիայի ֆուտբոլային ասոցիացիան (FA) մեղադրանք է ներկայացրել «Նյուքասլի» իտալացի կիսապաշտպան Սանդրո Տոնալիին:
Կազմակերպության հաղորդագրության մեջ նշված է, որ 23-ամյա ֆուտբոլիստը 2023 թվականի օգոստոսի 12-ից հոկտեմբերի 12-ն ընկած ժամանակահատվածում 50 անգամ խաղադրույք է կատարել: Տոնալին առաջադրված մեղադրանքին պետք է պատասխանի մինչև ապրիլի 5-ը։
Կիսապաշտպանն իտալական «Միլանի» կազմում հանդես գալու ժամանակ խաղադրույքներ կատարելու համար նախորդ տարվա հոկտեմբերից որակազրկված է: Նրա որակազրկման ժամկետը կավարտվի հուլիսին:
Հիշեցնենք, որ Տոնալին նախորդ տարվա հուլիսի 3-ին էր 64 միլիոն եվրոյով «Միլանից» տեղափոխվել անգլիական ակումբ: Ընթացիկ մրցաշրջանում կիսապաշտպանը «Նյուքասլի» կազմում անցկացրած 12 խաղում խփել է մեկ գոլ:
