UFC-ի թեթև քաշային կարգի դասակարգման աղյուսակի առաջատար Արման Ծառուկյանը խոսել է գործող չեմպիոն Իսլամ Մախաչևի դեմ տիտղոսային մենամարտի մասին:
«Այժմ ես և Իսլամը մեր առաջին մենամարտի համեմատ այլ մակարդակի վրա ենք: Ես կփորձեմ ամեն ինչ անել այս պայքարում հաղթելու համար:
Երբ հզոր հարվածներ հասցնեմ Մախաչևին, նա կմոռանա Խաբիբի մարտավարության մասին (խմբ. Մախաչևը Խաբիբի թիմից է): Երբ ես մենամարտեցի Օլիվեյրայի դեմ, նա փորձեց խեղդել ինձ, դրանից հետո ես կորցրի մենամարտի համար նախատեսած մարտավարությունը և ծրագիրը: Ես այլևս ոչինչ չէի հիշում։ Հետևաբար, պետք է առաջին ռաունդում ճիշտ հարվածեմ Իսլամին»,- ասել է Ծառուկյանը ESPN MMA-ին տված հարցազրույցում։
Հիշեցնենք, որ հայ և դաղստանցի մարտիկների տիտղոսային մենամարտը տեղի կունենա 2025 թվականի հունվարի 19-ին Լոս Անջելեսում:
2019 թվականին Ծառուկյանը UFC-ում նորամուտը նշել էր Մախաչևի դեմ մենամարտով և դիտարժան պայքարում պարտվել միավորներով:
Արման Ծառուկյանն օկտագոնում անցկացրել է 25 մենամարտ, ունի 22 հաղթանակ և երեք պարտություն: Մախաչևը 27 մենամարտում տարել է 26 հաղթանակ և պարտվել մեկ դիմակայությունում:
