«Արարատ-Արմենիայի» կիսապաշտպան Տենտոն Յենեն «Գանձասարի» հետ առաջնության 28-րդ տուրի խաղում դուբլ ձևակերպելով, թիմի կազմում բոլոր մրցաշարերում խփած 43 գոլով դարձավ ակումբի պատմության գլխավոր ռմբարկուն: Նա գերազանցեց Մաիլսոն Լիմայի ռեկորդային ցուցանիշը, որի հաշվին 41 գոլ էր գրանցված:
Գոլերից 39-ը Յենեն խփել է առաջնությունում, մեկական անգամ աչքի է ընկել ՀՀ գավաթի և Սուպերգավաթի մրցաշարում, 2 գնդակ էլ իր օգտին է գրանցել Եվրագավաթներում:
Տենտոն Յենեն 4-րդ մրցաշրջանն է անցկացնում Հայաստանում, որտեղ ելույթները սկսել է «Նորավանքում»: Նիգերիացի ֆուտբոլիստը Հայաստան էր տեղափոխվել 2022թ. հունվարին Սլովակիայի «Ժիլինա-2» թիմից: 2021/22թ. առաջնության գարնանային հատվածում Տենտոնը «Նորավանքում» անցկացրած 16 խաղում 3 գոլ խփեց: Նա թիմի կազմում իր առաջին տիտղոսը նվաճեց՝ դառնալով Հայաստանի գավաթակիր: Ընդ որում գավաթի եզրափակչում «Ուրարտուի» դարպասը խփած 2 գոլերից մեկի հեղինակը հենց Տենտոնն էր:
«Նորավանքի» լուծարումից հետո նիգերիացի ֆուտբոլիստը հրավիրվեց «Արարատ-Արմենիա», որի կազմում 3-րդ մրցաշրջանն է անցկացնում: «Արարատ-Արմենիայում» նրա նորամուտը կայացել է 2022թ. հուլիսի 21-ին Էստոնիայի «Պայդեի» հետ Երևանում անցկացված Կոնֆերենցիաների լիգայի որակավորման 2-րդ փուլի խաղում:
Իսկ հուլիսի 31-ին Տենտոնն «Արարատ-Արմենիայում» իր առաջին խաղն անցկացրեց նաև Հայաստանի առաջնությունում՝ մասնակցելով «Ուրարտուի» հետ մեկնարկային տուրի հանդիպմանը: Օգոստոսի 11-ին «Արարատի» հետ կայացած հաջորդ խաղում Տենտոնը բացեց գոլերի հաշիվն «Արարատ-Արմենիայում»:
Նոր թիմում լիովին բացահայտվեցին նիգերիացի ֆուտբոլիստի ռմբարկուական հատկանիշները; 34 խաղում խփած 10 գոլով նա դարձավ թիմի երկրորդ լավագույն ռմբարկուն՝ 3 գնդակով զիջելով Ուիլֆրեդ Կուասի Էզային: Հաջորդ մրցաշրջանում պատմությունը կրկնվեց: Տենտոնը խփած 16 գոլով կրկին երկրորդն էր՝ այս անգամ 2 գնդակով զիջելով Մոհամեդ Յատարային:
Ընթացիկ առաջնությունում թիմի լավագույն ռմբարկուի տիտղոսի համար պայքարում Տենտոնի գլխավոր մրցակիցը Մարիուս Նուբիսին է: Մինչև «Ուրարտուի» հետ ապրիլի 5-ին կայացած առաջնության հանդիպումը, Տենտոնը 11 գնդակով գլխավորում էր թիմի լավագույն ռմբարկուների ցանկը: Սակայն «Ուրարտուի» հետ խաղում Նուբիսին ընթացիկ առաջնությունում երկրորդ անգամ հեթ-տրիկի հեղինակ դարձավ ու 13 գնդակով շրջանցեց Տենտոնին: Ներկայումս թիմակիցների միջև կրկին 2 գոլի տարբերություն է հաստատվել: Նուբիսին 15 գոլ է խփել, Տենտոնի հաշվին 13 գոլ է գրանցված:
Եթե ընթացիկ առաջնությունում «Արարատ-Արմենիայում» լավագույն ռմբարկուի տիտղոսի համար պայքար է ծավալվել Տենտոնի և Նուբիսիի միջև, ապա թիմի պատմության ամենաարդյունավետ ֆուտբոլիստների ցանկում նիգերիացին մրցակցությունից դուրս է: Նա դեռ երկար տարիներ կգլխավորի ցանկը՝ բարելավելով իր ցուցանիշները:
FastNews-ը ներկայացնում է «Արարատ-Արմենիայի» պատմության ամենաարդյունավետ ֆուտբոլիստների ցուցանիշները:
|
Ֆուտբոլիստներ |
Ա |
Գ |
ՍԳ |
Ե |
ԸՆԴ |
|
1. Տենտոն Յենե |
39 |
1 |
1 |
2 |
43 |
|
2. Մաիլսոն Լիմա |
33 |
1 |
2 |
5 |
41 |
|
3. Յուսուֆ Օտուբանջո |
27 |
3 |
- |
- |
30 |
|
4. Անտոն Կոբյալկո |
19 |
7 |
- |
4 |
30 |
|
5. Ուիլֆրեդ Կուասի Էզա |
22 |
3 |
- |
2 |
27 |
|
6. Լուիս Ուգոչուկվու Օգանա |
9 |
8 |
- |
2 |
19 |
|
7. Մոհամեդ Յատարա |
18 |
- |
- |
- |
18 |
|
8. Մարիուս Նուբիսի |
15 |
1 |
2 |
- |
18 |
|
9. Արթուր Սերոբյան |
11 |
2 |
- |
3 |
16 |
|
10. Պետրոս Ավետիսյան |
10 |
2 |
- |
3 |
15 |
|
11. Ջոնաթան Դուարտե |
12 |
1 |
- |
2 |
15 |
