«Գանձասարի» դեմ Հայաստանի առաջնության 19-րդ տուրի մրցավեճում «Փյունիկի» պաշտպան Տարոն Ոսկանյանը կրկնակի հոբելյան նշեց՝ Fastex Պրեմիեր լիգայում անցկացնելով 300-րդ խաղն ու «Փյունիկի» կազմում 150-րդ հանդիպումը:  

Հայաստանի առաջնությունների 33-ամյա պատմության ընթացքում Ոսկանյանը 300 խաղի սահմանագիծը հատած 19-րդ ֆուտբոլիստն է: Այս ցուցանիշին հասնելու համար «Փյունիկի» 31-ամյա ֆուտբոլիստից 13 մրցաշրջան պահանջվեց:

Պրոֆեսիոնալ ֆուտբոլիստի կարիերան Տարոն Ոսկանյանը սկսել է «Փյունիկում», որի կազմում նորամուտը նշել է 2011թ. ապրիլի 2-ին «Ուլիսի» հետ կայացած առաջնության խաղում: Այդ օրը Վարդան Մինասյանը 18-ամյա Տարոնին ընդգրկել էր թիմի մեկնարկային կազմում: Առաջին իսկ մրցաշրջանում պատանի ֆուտբոլիստն իր հաստատուն տեղը գրավեց «Փյունիկի» կազմում՝ մասնակցելով առաջնության 28 հանդիպումներից 22-ին ու թիմակիցների հետ դարձավ արծաթե մրցանակակիր:

Հետաքրքիր է, որ մինչև «Փյունիկի» կազմում նորամուտը նշելը, Ոսկանյանը հասցրել էր իր առաջին տիտղոը նվաճել: «Փյունիկ-2»-ի սանն ընդգրկվել էր 2010թ. սեպտեմբերի 24-ին «Բանանցի» հետ կայանալիք Սուպերգավաթի խաղին հայտավորված ֆուտբոլիստների ցանկում: Ճիշտ է, 17-ամյա Տարոնը խաղադաշտ դուրս չեկավ, սակայն «Փյունիկի» 2-0 հաշվով տարած հաղթանակի շնորհիվ մրցակարգի համաձայն դարձավ Հայաստանի սուպերգավաթակիր:

«Փյունիկի» կազմում հաջորդ երկու սուպերգավաթների նվաճմանը Ոսկանյանն արդեն անմիջական մասնակցություն է ունեցել՝ մասնակցելով 2011թ. «Բանանցի» (3-0) և 2015թ. «Միկայի» (3-0) հետ կայացած վճռորոշ հանդիպումներին: 2013-2015թթ. Ոսկանյանը «Փյունիկի» կազմում դարձել է հանրապետության եռակի գավաթակիր, իսկ 2014/15թթ. մրցաշրջանում իր առաջին ոսկե մեդալն է նվաճել, հաջորդ տարի էլ արժանացել է բրոնզե մեդալի:

2015/16թթ. առաջնության ավարտից հետո Տարոն Ոսկանյանը տեղափոխվեց Կիպրոս, որտեղ մեկական մրցաշրջան անցկացրեց «Կարմիոտիսա» և «Նեա Սալամիս» թիմերում՝ ընդհանուր առմամբ անցկացնելով 39 խաղ:

Կիպրոսից վերադառնալով Հայաստան, Տարոն Ոսկանյանն ընդունեց «Ալաշկերտի» հրավերը, ինչը նոր էջ էր արդեն զգալի փորձ ու վարպետություն ձեռք բերած ֆուտբոլիստի կարիերայում: «Ալաշկերտում» էլ նա հասավ նվաճումների՝ արժանանալով Հայաստանի կրկնակի չեմպիոնի տիտղոսին (2017/18, 2020/21թթ.), մեկական անգամ դառնալով ՀՀ գավաթակիր (2019թ.) ու սուպերգավաթակիր (2021թ.) և կրկնակի բրոնզե մրցանակակիր (2019/20, 2021/22թթ.):

Նախորդ առաջնության ավարտից հետո Տարոն Ոսկանյանն էլ «Ալաշկերտի» մի խումբ ֆուտբոլիստների հետ հեռացավ թիմից և 7-ամյա ընդմիջումից հետո վերադարձավ հարազատ ակումբ, որի կազմում էլ նշեց իր նշանակալի հոբելյանը:

Հայաստանի Բարձրագույն խմբի առաջնություններում առաջինը 300 խաղի սահմանագիծը հատել է Հովհաննես Թահմազյանը: Նա երանելի բարձունքը հաղթահարել է 34 տարեկանում, 2004թ. հոկտեմբերի 23-ին`«Միկայի» կազմում մասնակցելով «Բանանցի» հետ հանդիպմանը: 3 տարի անց` 2007թ. հունիսի 18-ին «Ուլիսի» հետ մրցավեճում «Բանանցի» 37-ամյա պաշտպան Կարեն Սիմոնյանը նշեց  300-րդ խաղի հոբելյանը: Իսկ հոկտեմբերի 7-ին «Բանանցի» հետ կայացած խաղում 300-րդ անգամ խաղադաշտ դուրս եկավ «Ուլիսի» 33-ամյա կիսապաշտպան Տիգրան Հովհաննիսյանը:

Հետագա տարիներին հայկական ֆուտբոլի ևս 15 վետերանների հաջողվեց հատել 300 խաղի սահմանագիծը: Մինչև Տարոն Ոսկանյանի հոբելյան նշելը, վերջինն «Արարատ-Արմենիայի» կիսապաշտպան Կարեն Մուրադյանն էր, որը Fastex Պրեմիեր լիգայում 300-րդ խաղն անցկացրել էր այս տարվա հոկտեմբերի 22-ին «Շիրակի» հետ կայացած մրցավեճում:

FastNews-ը ներկայացնում է Հայաստանի առաջնություններում 300 և ավելի խաղ անցկացրած ֆուտբոլիստների ցանկը:

Ֆուտբոլիստներ	Խաղ	Մրցաշրջան
1. Հովհաննես Թահմազյան	461	1992-2011
2. Տիգրան Դավթյան	409	1999-2014/15
3. Արտակ Գրիգորյան	404	2008-2024/25
4. Հրայր Մկոյան	369	2004-2013/14, 2017/18-2024/25
5. Սարգիս Հովսեփյան	365	1992-1997, 2004-2012/13
6. Արթուր Քոչարյան	357	1992-96/97, 1999-2003, 2006-2012/13
7. Գևորգ Կասպարով	348	1997-2002, 2004-2006, 2008-2020/2021
8. Արտակ Եդիգարյան	346	2007-2013/14, 2015/16-2024/25
9. Արարատ Հարությունյան	336	1995-2012/13
10. Արսեն Ավետիսյան	329	1999-2000, 2006-2011
11. Կարեն Ալեքսանյան	324	1998-2004, 2008-2016/17
12. Արտյոմ Ադամյան	320	2000-2012/13
13. Նորայր Գրիգորյան	319	2001-2006, 2008-2016/17
14. Կարեն Սիմոնյան	314	1992-1994, 96/97-2007
15. Կարեն Մուրադյան	306	2011-2024/25
16. Տիգրան Հովհաննիսյան	305	1992-2008
17. Արամ Բարեղամյան	304	2005-2019/20
18. Գագիկ Դաղբաշյան	301	2007-2014/15, 2016/17-2021/22, 2023/24
19. Տարոն Ոսկանյան	300	2011-2015/16, 2017/18-2024/25