Սաուդյան Արաբիայի «Ալ Նասր» ակումբի աստղային նորեկ, պորտուգալացի հարձակվող Կրիշտիանու Ռոնալդուն վաճառում է Մանչեսթեր քաղաքի հարևանությամբ գտնվող Չեշիր գյուղի շքեղ առանձնատունը, հայտնում է Goal.com-ը:
Վաճառքի գործով զբաղվում է անշարժ գույքի գործակալ Ջեքսոն Ստոպսը, որն առանձնատունը ներկայացնում է որպես «ժամանակակից դիզայնի գլուխգործոց»։
38-ամյա ֆուտբոլիստը տան վաճառքից ակնկալում է վաստակել 5,5 միլիոն ֆունտ ստերլինգ (6,25 միլիոն եվրո): Առանձնատունը նույնիսկ կինոթատրոն ունի:
Հիշեցնենք, որ «Ոսկե գնդակի» 5-ակի դափնեկիրը նախորդ տարվա նոյեմբերին խզել էր պայմանագիրն անգլիական «Մանչեսթեր Յունայթեդի» հետ: Դեկտեմբերի 30-ին Պորտուգալիայի հավաքականի ավագն ազատ գործակալի կարգավիճակում տեղափոխվել էր «Ալ Նասր», որի կազմում ընթացիկ մրցաշրջանում մասնակցել է 5 հանդիպման, խփել նույնքան գոլ և կատարել երկու գոլային փոխանցում:
