Անգլիայի չեմպիոն «Մանչեսթեր Սիթիի» իսպանացի կիսապաշտպան Ռոդրին ընթացիկ մրցաշրջանում այլևս խաղադաշտ դուրս չի գա, հայտնում է ESPN-ը։
Եվրոպայի չեմպիոնը Լոնդոնի «Արսենալի» դեմ Անգլիայի Պրեմիեր լիգայի 5-րդ տուրի տնային խաղում (2-2) վնասվածքի պատճառով փոխարինվելուց հետո բուժզննում է անցել: Առաջին թեստերը ցույց են տվել, որ Իսպանիայի հավաքականի ֆուտբոլիստն աջ ծնկի խաչաձեւ կապանների պատռվածք է ստացել։
Ռոդրին պետք է լրացուցիչ թեստեր անցնի։ Ամենայն հավանականությամբ, իսպանացին վիրահատության կենթարկվի Բարսելոնայում։
Անգլիական ակումբը Ռոդրիի վնասվածքի վերաբերյալ դեռևս տեղեկություն չի հայտնել:
Ընթացիկ մրցաշրջանում իսպանացին մասնակցել է երեք հանդիպման, գոլի կամ ասիստի հեղինակ չի դարձել:
