Երևանի «Ալաշկերտի» 30-ամյա կիսապաշտպան Ռումյան Հովսեփյանը ելույթները կշարունակի Մալթայի «Ֆլորիանա» ակումբում՝ տեղեկացնում է միջերկրածովյան այդ կղզու թիմի լրատվական ծառայությունը։

Նշվում է, որ Հովսեփյանը հունվարի տրանսֆերային պատուհանի ընթացքում ակումբի երկրորդ նորեկն է։ «Ֆլորիանան» որակյալ խաղացողների ներգրավման հավակնոտ ծրագիր է իրականացնում։ Ակումբում հուսով են, որ Հովսեփյանը նոր որակ և երանգներ կհաղորդի գլխավոր թիմի ելույթներին։

Հովսեփյանն արդեն ունի արտասահմանում հանդես գալու փորձ. 2014-15 թվականներին խաղացել է Դոնեցկի «Մետալուրգում» (Ուկրաինա), 2015-ին՝ նույն երկրի «Ստալ», իսկ 2019-ից՝ բուլղարական «Արդա» ակումբում։

Հայաստանում խաղացել է «Իմպուլս», «Բանանց», «Փյունիկ» և «Շիրակ» ակումբներում։ Հայաստանի ազգային հավաքականում անցկացրել է 17 հանդիպում, խփել 2 գոլ։

Մալթայի ընթացիկ առաջնությունում «Ֆլորիանան» զբաղեցնում է երկրորդ տեղը։