«Լիվերպուլի» կիսապաշտպան Ալեքսիս Մաքալիսթերը կարող է կարիերան շարունակել Մադրիդի «Ռեալում»։

Ըստ TyC Sports-ի` «Արքայական ակումբը» հետաքրքրված է արգենտինացի ֆուտբոլիստի ծառայություններով։ «Ռեալը» կիսապաշտպանի տրանսֆերը մտադիր է իրականցնել ոչ թե այս տարի, այլ 2025 թ. ամռանը։

Մադրիդյան ակումբում 25-ամյա Մաքալիսթերին դիտարկում են` որպես Լուկա Մոդրիչի և Տոնի Կրոսի փոխարինողի։ Երկու ֆուտբոլիստներն էլ, ամենայն հավանականությամբ, հաջորդ տարվա ամռանը կլքեն «Ռեալը»։ «Լիվերպուլի» ու Մաքալիսթերի միջև 2028 թ. հունիսի 30-ին ավարտվող պայմանագրում առկա է 70 միլիոն եվրո հրաժարագնի կետ։

Մերսիսայդյան ակումբին մոտ կանգնած աղբյուրները հաստատում են, որ Մաքալիսթերի տրանսֆերի վերաբերյալ «Լիվերպուլը» մի շարք հարցումներ է ստացել, բայց պաշտոնական առաջարկ դեռ չի եղել։

Արգենտինայի հավաքականի ֆուտբոլիստը 2023 թ. ամռանն է 42 միլիոն եվրոյով «Բրայթոնից» տեղափոխվել «Լիվերպուլ»։ Նա 2023/24 մրցաշրջանում 45 խաղում խփել է 6 գոլ, կատարել 7 ասիստ։