Fastex Հայաստանի Պրեմիեր լիգայի չեմպիոն Երևանի «Փյունիկը» երկրորդ անընդմեջ հաղթանակը տարավ Կոնֆերենցիաների լիգայի խմբային փուլում:

H խմբի երրորդ տուրում Եղիշե Մելիքյանի գլխավորած թիմը Վազգեն Սարգսյանի անվան «Հանրապետական» մարզադաշտում ընդունեց Լիտվայի չեմպիոն Վիլնյուսի «Ժալգիրիսին» և առավելության հասավ 2-0 հաշվով:

«Փյունիկի» կազմում խաղի հաշիվը 43-րդ րոպեին բացեց բրազիլացի պաշտպան Ժունինյոն, իսկ երկրորդ գոլը 61-րդ րոպեին խփեց նիգերիացի հարձակվող Յուսուֆ Օտուբանջոն:

3 խաղից հետո «Փյունիկն» ունի 6 միավոր և հավասարվեց H խմբի առաջատար շվեյցարական «Բազելին», որը մեկ հանդիպում պակաս է անցկացրել և հոկտեմբերի 7-ին կընդունի Սլովակիայի չեմպիոն Բրատիսլավայի «Սլովանին»: «Ժալգիրիսը» և «Սլովանն» ունեն 1-ական միավոր:

Հիշեցնենք, որ Կոնֆերենցիաների լիգայի նախորդ տուրում Հայաստանի 15-ակի չեմպիոնը տանը 2-0 հաշվով հաղթել էր «Սլովանին», որի կազմում խաղում է Հայաստանի հավաքականի հարձակվող Տիգրան Բարսեղյանը: Չորրորդ տուրում «Փյունիկը» հոկտեմբերի 13-ին արտագնա խաղում կրկին կմրցի «Ժալգիրիսի» հետ:

Կոնֆերենցիաների լիգա, երրորդ տուր

H խումբ

«Փյունիկ» (Հայաստան) - «Ժալգիրիս» (Լիտվա)՝ 2-0

Ժունինյո, 43, Յուսուֆ Օտուբանջո, 61