Ծանրամարտի տղամարդկանց Հայաստանի հավաքականի գլխավոր մարզիչ Փաշիկ Ալավերդյանը լրագրողների հետ զրույցում ամփոփել է ավարտին մոտեցող տարին։
«Տարին շատ բերքառատ էր ինձ համար: Մասնակցել ենք 5 մրցման, քիչ մեդալ բերել ենք միայն աշխարհի առաջնությունից, բայց ունեցանք աննախադեպ արդյունք՝ ոսկե մեդալ գերծանր քաշային կարգում:
Այս տարի ունեցել ենք 136 մեդալ՝ 57 ոսկե, 39 արծաթե ու 40 բրոնզե: Միայն 30 անգամ ես պարտադրել եմ աշխարհին ու Եվրոպային լսել մեր հիմնը։ Ահա, թե ով եմ եղել ես ամբողջ տարվա ընթացքում»,- նշել է մարզիչը։
Փաշիկ Ալավերդյանը նաև դժգոհել է ԿԳՄՍ նախարարության կողմից անցկացված «Տարվա լավագույնների» քվերակության արդյունքներից՝ մարզիչի ընտրության հարցում մարզական լրագրողներին մեղադրելով անաչառ չլինելու մեջ։ Լավագույն մարզիչ էր ճանաչվել սպորտային մարմնամարզության Հայաստանի հավաքականը գլխավորող Հակոբ Սերոբյանը։