VNews-ը շարունակում է VBET Հայաստանի Պրեմիեր լիգայի հոբելյանական՝ 30-րդ առաջնության մասնակից թիմերի ելույթների ամփոփումը: Այս անգամ կանդրադառնանք Հայաստանի գավաթակիր «Նորավանքին», որը տարբեր պատճառով դադարեցրել է ելույթները:

1. Բարձրագույն խմբի նորեկը հոբելյանական առաջնությունն ավարտեց 7-րդ տեղում՝ Վահե Գևորգյանի գլխավորությամբ անցկացրած 32 հանդիպումներում վաստակելով 28 միավոր (7 հաղթանակ, 7 ոչ-ոքի, 18 պարտություն, խփած և բաց թողած գոլեր՝ 36-55), ինչը հնարավոր միավորների 29,1 տոկոսն է: «Սևանի» հետ չեղարկված 2 խաղերում էլ «Նորավանքը» նվազագույն հաշվով պարտվել էր:

2. Առաջնության աշնանային հատվածը «Նորավանքն» ավարտել էր նախավերջին՝ 8-րդ հորիզոնականում՝ 15 հանդիպումներում վաստակելով 9 միավոր (2 հաղթանակ, 3 ոչ-ոքի, 10 պարտություն, խփած և բաց թողած գոլեր՝ 9-24), ինչը հնարավոր միավորների 20 տոկոսն է:

Առաջնության գարնանային հատվածում անցկացրած 17 հանդիպումներում «Նորավանքի» օգտին 19 միավոր գրանցվեց (5 հաղթանակ, 4 ոչ-ոքի, 8 պարտություն, գնդակները՝ 27-31): Դա հնարավոր միավորների 37,2 տոկոսն էր:

3. «Նորավանքի» ելույթներում սեփական դաշտի գործոնը մեծ դեր խաղաց: Վաստակած միավորների 78,5 տոկոսը թիմի օգտին գրանցվել է սեփական խաղադաշտում (6 հաղթանակ, 4 ոչ-ոքի, 6 պարտություն, խփած և բաց թողած գոլեր՝ 24-21):

Տնային խաղում «Նորավանքը» պարտվել է «Արարատ-Արմենիային» (0-2, 0-2), «Ուրարտուին» (0-1), «Ալաշկերտին» (0-2), «Փյունիկին» (1-2) և «Արարատին» (0-1):

Իսկ ահա հյուրընկալվելիս «Նորավանքը» շատ անհաջող ելույթներ ունեցավ՝ անցկացրած 16 հանդիպումներում վաստակելով ընդամենը 6 միավոր (1 հաղթանակ, 3 ոչ-ոքի, 12 պարտություն, խփած և բաց թողած գոլեր՝ 12-34), ինչը հնարավոր միավորների 12,5 տոկոսն է: Մրցակցի դաշտում միակ հաղթանակը «Նորավանքը» տարել է ԲԿՄԱ-ի նկատմամբ (1-0):

4. Առաջնությունում 13 խաղ անընդմեջ «Նորավանքը» չվայելեց հաղթանակի բերկրանքը՝ վաստակելով ընդամենը 3 միավոր, կրելով 4 անընդմեջ պարտություն: Թիմին հաջողվեց 3 անընդմեջ հաղթանակ տանել, 3 խաղ (2 անգամ) ընթանալ առանց պարտության:

4 խաղ անընդմեջ՝ 474 րոպե շարունակ, «Նորավանքի» ֆուտբոլիստներին չհաջողվեց գրավել մրցակցի դարպասը: 32 հանդիպումներից միայն 3-ում թիմի դարպասն անառիկ մնաց («Ալաշկերտ»՝ 0-0, «Վան»՝ 1-0, ԲԿՄԱ՝ 1-0), իսկ ահա 13 խաղում «Նորավանքի» ֆուտբոլիստները չկարողացան գրավել մրցակցի դարպասը: «Նորավանքը» խոշոր հաշվով մեկ հաղթանակ տարավ՝ 7-1 հաշվով ջախջախելով «Վանին»: Թիմը խոշոր հաշվով պարտվեց «Ուրարտուին» (0-3), «Ալաշկերտին» (0-3) և «Արարատին» (0-4):

5. «Նորավանքի» մասնակցությամբ հանդիպումներում նշանակվել է 11մ 11 հարված, որից իրացվել է 8-ը: Թիմի օգտին նշանակված 6 հարվածներից իրացվել է 4-ը: Սերգեյ Օռլովը, 4 անգամ մոտենալով 11մ նշակետին, դիպուկ է իրացրել հարվածներից 2-ը՝ խոցելով «Նոայի» դարպասապահ Գրիգորի Մաթևոսյանի և բանակային Արման Ներսեսյանի պաշտպանած դարպասները: Իսկ ահա «Վանի» դարպասապահներ Արման Մելիքսեթյանն ու Դոմենիկո Կոպոլան հետ են մղել Օռլովի հարվածները:

Մեկական անգամ 11մ հարվածը հաջող են իրացրել Եվգենի Կոբզարն ու Իբրահիմ Շուեյբուն՝ գրավելով համապատասխանաբար փյունիկցի Դավիթ Յուրչենկոյի և ԲԿՄԱ-ի դարպասապահ Ռաֆայել Մանասյանի պաշտպանած դարպասները:

«Նորավանքի» դարպասին նշանակված 11մ 5 հարվածներից դիպուկ է իրացվել 4-ը: Հենրի Ավագյանը հաղթող է դուրս եկել փյունիկցի Սերժ Դեբլեի հետ մենապայքարում: Իսկ ահա «Ուրարտուի» լեգեոնական Ջոնել Դեսիրեն, «Արարատ-Արմենիայի» խաղացողներ Յուսուֆ Օտուբանջոն և Մաիլսոն Լիման գրավել են Ավագյանի պաշտպանած դարպասը:

Դանիիլ Պոլյանսկու դարպասին նշանակված 11մ միակ հարվածը դիպուկ է իրացրել «Նոայի» կիսապաշտպան Պետրոս Ավետիսյանը:

6. Առաջնության աշնանային հատվածում անցկացրած 15 հանդիպումներում «Նորավանքն» ընդամենը 9 գոլ էր խփել: Իսկ ահա գարնանային հատվածում արդյունավետությունը զգալիորեն աճեց՝ 17 խաղում 27 գոլ:

Առաջնությունում խփած 36 գոլերի հեղինակներ դարձան «Նորավանքի» 14 ֆուտբոլիստներ, մեկ գնդակ էլ սեփական դարպասը խփեց փյունիկցի Զորան Գայիչը: Կարեն Նալբանդյանը, Թեմուր Մուստաֆինը, Բենիամին Տեչիեն, Սիմոն Օբոնդեն, Սերգեյ Օռլովը, Իբրահիմ Շուեյբուն, Յեննե Տենտոնը և Բաբու Չամը բացեցին գոլերի հաշիվը VBET ՀՊԼ-ում:

Բոլորից արդյունավետ գործեց գարնանը թիմի կազմը համալրած Իբրահիմ Շուեյբուն՝ խփելով 10 գոլ: Առաջնության գարնանային հատվածում դա լավագույն ցուցանիշն էր Արթուր Միրանյանի և Ուգո Ֆիրմինոյի հետ:

Սերգեյ Օռլովը դարձավ VBET ՀՊԼ-ում գոլ խփած «Նորավանքի» ամենատարեց ֆուտբոլիստը: Ապրիլի 12-ին կայացած խաղում նա «Վանի» դարպասը գրավել էր 32 տարեկան 357 օրականում:

Սիմոն Օբոնդեն էլ դարձավ «Նորավանքում» VBET ՀՊԼ-ում գոլ խփած ամենաերիտասարդ ֆուտբոլիստը: Օգոստոսի 6-ին նա «Փյունիկի» դարպասը գրավել էր 20 տարեկան 88 օրականում:

7. «Նորավանքի» դարպասը պաշտպանեցին 4 դարպասապահներ: Դանիիլ Պոլյանսկին անցկացրած 9 հանդիպումներում 16 գոլ բաց թողեց (միջինը մեկ խաղում՝ 1,7 գոլ):

Դուշան Չուբրակովիչն անցկացրած 7 հանդիպումներում 8 գոլ բաց թողեց (միջինը մեկ խաղում՝ 1,1 գոլ), 2 անգամ դարպասն անառիկ պահեց:

Առաջնության գարնանային հատվածում թիմի դարպասի պաշտպանությունը վստահվել էր Հենրի Ավագյանին, որը 16 խաղում 27 գոլ բաց թողեց (միջինը մեկ խաղում՝ 1,6 գոլ), մեկ անգամ դարպասն անառիկ պահեց:

«Արարատի» հետ խաղում թիմի դարպասը պաշտպանած Դանիիլ Յարուսովը 4 գոլ բաց թողեց:

8. Առաջնության աշնանային հատվածում «Նորավանքի» ամենատարեց ֆուտբոլիստը 32-ամյա Սերգեյ Օռլովն էր: Գարնանային հատվածում ամենատարեցն Արթուր Ավագյանն էր, որը թիմի կազմում իր վերջին հանդիպումն անցկացրել էր 34 տարեկան 325 օրականում:

Ամենաերիտասարդ ֆուտբոլիստն Արթուր Սոխիևն էր, որը թիմի կազմում նորամուտը նշել է 18 տարեկան 349 օրականում: Հայ ֆուտբոլիստներից ամենաերիտասարդը Կարեն Նալբանդյանն էր, որն առաջին խաղը «Նորավանքում» անցկացրել է 19 տարեկան 109 օրականում:

9. «Նորավանքի» կազմում VBET ՀՊԼ-ում անցկացրած խաղերի քանակով թիմի ռեկորդակիրներն են Միխայիլ Բաշիլովը և Ջուլիուս Դավիդ Ուֆուոման, որոնք մասնակցել են 32-ական հանդիպման (ներառյալ նաև «Սևանի» հետ չեղարկված 2 խաղերը):

Բարձրագույն խմբում անցկացրած խաղերի ընդհանուր քանակով (252) «Նորավանքի» ամենափորձառու ֆուտբոլիստն Արթուր Ավագյանն էր:

10. Առաջնության հանդիպումներում (ներառյալ «Սևանի» հետ չեղարկված 2 խաղերը) Վահե Գևորգյանն ասպարեզ դուրս բերեց 32 ֆուտբոլիստների, որոնցից 21-ը լեգեոնականներ էին:

Առաջնության հանդիպումներում «Նորավանքի» ֆուտբոլիստները 75 անգամ զգուշացվել են, Թեմուր Մուստաֆինը, Սերգեյ Օռլովը և Արթուր Ավագյանը մեկական անգամ հեռացվել են խաղադաշտից: Առավել հաճախ՝ 7-ական անգամ դեղին քարտի են արժանացել Էբերտ Կարդոսոն, Թեմուր Մուստաֆինն ու Միխայիլ Բաշիլովը:

VNews-ը ներկայացնում է «Նորավանքի» ֆուտբոլիստների ցուցանիշները VBET Հայաստանի Պրեմիեր լիգայի 30-րդ առաջնությունում (ներառյալ նաև «Սևանի» հետ չեղարկված 2 խաղերը):

Ֆուտբոլիստներ	Խաղ	Գոլ	Զ (Հ)
1. Միխայիլ Բաշիլով	32	-	7
2. Ջուլիուս Դավիդ Ուֆուոմա	32	-	6
3. Թեմուր Մուստաֆին	30	1	7 (1)
4. Էբերտ Կարդոսո դա Սիլվա	28	2	7
5. Սերգեյ Օռլով	26	6	4 (1)
6. Կարեն Նալբանդյան	26	1	3
7. Արման Մկրտչյան	25	1	2
8. Նորայր Նիկողոսյան	25	-	1
9.Արման Խաչատրյան	25	-	5
10. Անդրանիկ Քոչարյան	23	-	1
11. Իբրահիմ Շուեյբու	17	10	-
12. Բաբու Չամ	17	3	-
13. Իգոր Զոնյիչ	17	-	4
14. Յեննե Տենտոն	16	3	3
15. Եվգենի Կոբզար	16	2	-
16. Դավիթ Մինասյան	16	1	1
17. Հենրի Ավագյան	16	-27	3
18. Արամ Քոչարյան	14	1	2
19. Տիմուր Ռուդոսելսկի	13	2	4
20. Արման Ասիլյան	12	-	1
21. Սիմոն Օբոնդե	11	1	2
22. Արթուր Ավագյան	11	-	5 (1)
23. Դանիիլ Պոլյանսկի	11	- 18	1
24. Էրիկ Պետրոսյան	9	-	-
25. Սանդի Ինուսա Ումարու	9	-	1
26. Մոզես Քենդիդուս	9	-	-
27. Արթուր Սոխիև	8	-	-
28. Դուշան Չուբրակովիչ	7	-8	1
29. Դավիդ Քուայե	5	-	3
30. Բենիամին Նանա Տեչիե	4	1	1
31. Քրիստիան Բոատենգ	4	-	-
32. Դանիիլ Յարուսով	1	-4	-