Բասկետբոլի ազգային ասոցիացիայի (NBA) քառորդ եզրափակիչում գործող չեմպիոն «Դենվեր Նագեթսը» կրճատեց «Մինեսոտա Թիմբերվուլվզի» հետ շարքի հաշիվը` 1-2։

«Նագեթսը» դիմակայության երրորդ խաղում հյուրընկալվելիս հաղթեց 117-90 հաշվով։ Հանդիպման ամենաարդյունավետ բասկետբոլիստը «Դենվերի» առաջատար, սերբ Նիկոլա Յոկիչն էր, որը գրանցեց դաբլ-դաբլ` 24 միավոր, 14 ռեբաունդ ու 9 ասիստ։ Հյուրերի կազմում 24 միավոր վաստակեց նաև կանադացի Ջամալ Մյուրերը, որը կատարեց նաև 5 արդյունավետ փոխանցում ու 4 անգամ տիրեց օղակից անդրադարձած գնդակին։

«Ինդիանա Փեյսերսը» նույնպես առաջին հաղթանակը տարավ քառորդ եզրափակիչում` տնային խաղում 111-106 հաշվով առավելության հասնելով «Նյու Յորք Նիքսի» նկատմամբ։ «Փեյսերսը» կրճատեց շարքի հաշիվը` 1-2։

Հանդիպման ամենաարդյունավետ բասկետբոլիստը «Ինդիանայի» խաղարկող պաշտպան Թայրիզ Հելիբերթոնն էր` 35 միավոր, 7 ասիստ ու 4 ռեբաունդ։

NBA, քառորդ եզրափակիչ

«Մինեսոտա Թիմբերվուլվզ» - «Դենվեր Նագեթս»` 90- 117 (20-28, 21-28, 25-37, 24-24)

«Ինդիայա Փեյսերս» - «Նյու Յորք Նիքս»` 111-106 (29-20, 34-38, 22-32, 26-16)