Ֆուտզալի Հայաստանի հավաքականի գլխավոր մարզիչ Ռուբեն Նազարեթյանը, խաղացողներ Դենիս Նևեդրովն ու Վլադիմիր Սանոսյանը ՀՖՖTV-ի հետ զրույցում ամփոփել են Ալբանիայի թիմի դեմ Եվրո-2026-ի որակավորման հիմնական փուլի երրորդ տուրի տնային խաղը, որն ավարտվել է Հայաստանի հավաքականի հաղթանակով՝ 4-0 հաշվով:
«Առաջին խաղակեսում փորձեցինք արագություններ զարգացնել: Երկրորդում կազմի փոփոխություն կատարեցի, արդյունքը տեսաք: Ալբանիան հիմնականում պաշտպանվում էր և հակագրոհներով խաղում: Ալբանիան ևս պայքարի մեջ է, երեք միավոր ունի: Այսօրվա խաղը բարդ ստացվեց, Տիրանայում կայանալիք մրցավեճը ևս այդպիսին կլինի»,- ասել է Նազարեթյանը:
«Տպավորություններն այս խաղից լավն են: Ալբանիան բարդ մրցակից է, մեզ ևս մեկ խաղ է սպասում նրանց դեմ: Միայն հաղթանակի հետևից ենք գնալու: Ալբանիայի դեմ երկրորդ խաղում ևս մենք պետք է լինենք թելադրողը»,- ասել է Նևեդրովը:
«Կրկին խաղի մեկնարկը դժվար էր, լավ է` մեր գոլերը խփեցինք: Հետագայում էլ ամեն ինչ մեր վերահսկողության տակ էր»,- ասել է Սանոսյանը:
Հայաստանի ազգային հավաքականը Ալբանիայի թիմին հաղթելուց հետո 6-րդ խմբի առաջատարն է: Նազարեթյանի գլխավորած թիմը 7 միավոր ունի, Ղազախստանի հավաքականը` չորս, Ալբանիայի ու Դանիայի թիմերը` երեքական:
Հիշեցնենք, որ առաջին տեղը գրաված հավաքականները միանգամից կնվաճեն Եվրո-2026-ի ուղեգիր: Խմբերում երկրորդ տեղը զբաղեցրած լավագույն 8 հավաքականները հանդես կգան անցումային փլեյ-օֆֆում:
Հայաստանի հավաքականը փետրվարի 5-ին Տիրանայում կհյուրընկալվի Ալբանիայի թիմին:
