Մոլդովական «Սֆինտուլ Գեորգե» ակումբը մեղադրվում է պայմանավորված խաղ անցկացնելու մեջ, հայտնում է այդ երկրի ոստիկանությունը:
Մոլդովայի ոստիկանության ներկայացրած տեսանյութի ձայնագրություններից պարզ է դարձել, որ «Սֆինտուլ Գեորգեի» ֆուտբոլիստները Տիրասպոլի «Շերիֆի» դեմ նախորդ տարվա մարտի 19-ին կայացած տնային խաղում նախօրոք ծրագրել են, որպեսզի առաջին խաղակեսն ավարտվի գոլազուրկ ոչ-ոքի, իսկ երկրորդսում բաց թողնեն երեք գոլ, որոնցից վերջինը 75-րդ րոպեից հետո:
Ապացույցներ հավաքելու նպատակով խուզարկություններ են կատարվել ակումբի մարզաբազայում և հանցավոր սխեմայի մեջ ներգրաված 7 կասկածյալների տներում ու մեքենաներում։ Հետաքննության ընթացքում առգրավվել են հաշվապահական փաստաթղթեր, համակարգիչներ, նոութբուքեր, պլանշետներ, 12 բջջային հեռախոսներ, 19 բանկային քարտեր, ինչպես նաև 14300 եվրո և 90000 լեյ (4500 եվրո) գումար։
Այժմ հանցավոր սխեմայի մեջ մեղադրվողներն ազատության մեջ են։ Նրանց սպառնում է մինչև 267,500 լեյ (13,500 եվրո) տուգանք կամ 2-6 տարի ժամկետով ազատազրկում: Նախաքննությունը շարունակվում է հանցագործության բոլոր հանցակիցների ինքնությունը պարզելու ուղղությամբ։
«Մենք հավաքել ենք տարբեր նյութեր և ապացույցներ, այդ թվում՝ բուքմեյքերական և խաղերի վերլուծության ընկերություններից, և բոլոր նյութերը պաշտոնապես փոխանցել ենք դատախազություն։ Դեպարտամենտը նաև երկու զեկույց է պատրաստել և ուղարկել էթիկայի հանձնաժողով՝ դրանում ներգրավված խաղացողներին որակազրկելու և ակումբին պատժելու առաջարկով։ Երբ կոմիտեն որոշում կայացնի, այդ մասին կհայտարարվի հրապարակայնորեն»,- հայտնել է Մոլդովայի ֆուտբոլի ֆեդերացիայի մամուլի ծառայությունը:
Մոլդովայի ոստիկանությունը հրապարակել է տեսանյութ, որտեղ առկա են ձայնագրություններ, միտումնավոր բաց թողած գոլերի տեսագրություններ և մի քանի կասկածյալների ձերբակալության կադրեր:
