Բրազիլական «Ֆլումինենսեի» պաշտպան Մարսելոն որակազրկվել է։ ԿՕՄՆԵԲՈԼ-ը 35-ամյա ֆուտբոլիստին որակազրկել է երեք խաղով, հաղորդում է ESPN-ը։

Արգենտինական «Արգենտինոս Խունիորսի» դեմ Լիբերտադորեսի գավաթի խաղարկության 1/8 եզրափակիչի առաջին խաղում Մարսելոն ծանր վնասվածք էր հասցրել մրցակցին։ Արգենտինացի պաշտպան Լուչիանո Սանչեսը ստացել էր ոտքի կոտրվածք և վիրահատվել է։ Բժիշկները 20-ից ավելի մետաղական շտիֆտ էին ամրացրել արգենտինացի ֆուտբոլիստի ոտքին։ Վերականգնման համար կպահանջվի 12-18 ամիս։ Որոշ մասնագետների կարծիքով, 29-ամյա Սանչեսն այլևս չի կարողանա վերադառնալ խաղադաշտ։

Հիշեցնենք, որ խախտումից հետո Մադրիդի «Ռեալի» և Բրազիլիայի հավաքականի նախկին պաշտպանը ստացել էր ուղիղ կարմիր քարտ ու արցունքներն աչքերին հեռացել խաղադաշտից։ Հանդիպումից հետո Մարսելոն ներողություն էր խնդրել ու շուտափույթ ապաքինում մաղթել Սանչեսին։