Fastex Հայաստանի Պրեմիեր լիգայի 10-րդ տուրում Չարենցավանում գրավելով «Լեռնային Արցախի» դարպասը՝ Էդգար Մովսեսյանը 9 գոլով դարձավ Բարձրագույն խմբում «Վանի» կարճատև պատմության լավագույն ռմբարկուն: Նա գերազանցեց թիմի նախկին հարձակվող Ուիլֆրեդ Կուասի Էզայի ցուցանիշը, որի հաշվին 8 գոլ էր գրանցված:
Էդգար Մովսեսյանն «Ուրարտուի» սան է, երևանյան թիմի հիմնական կազմում ելույթները սկսել էր 2015-16թթ. առաջնությունում՝ մասնակցելով 10 խաղի:
Բարձրագույն խմբում գոլերի հաշիվը Մովսեսյանը բացել է «Նոայի» կազմում՝ 2018-19թթ. առաջնությունում գրավելով «Լոռիի» դարպասը: Հաջորդ մրցաշրջանում «Նոայում» 4 խաղ անցկացնելուց հետո երիտասարդ ֆուտբոլիստը տեղափոխվեց Առաջին խմբում ելույթ ունեցող նորաստեղծ «Վան», որի կազմում թիմակիցների հետ նվաճեց 2020-21թթ. Բարձրագույն խմբի առաջնության ուղեգիր:
«Վանում» Մովսեսյանը թիմի հիմնական կազմի ֆուտբոլիստներից մեկն էր, որը մասնակցեց Բարձրագույն խմբի առաջնության բոլոր 25 հանդիպումներին՝ դառնալով 4 գոլի հեղինակ: Դա 8 գոլով թիմի լավագույն ռմբարկու ճանաչված Ուիլֆրեդ Կուասի Էզայից հետո 2-րդ ցուցանիշն էր: Հետաքրքիր է, որ «Վանում» ևս իր առաջին գոլը Մովսեսյանը խփել էր «Լոռիի» դարպասը:
Հաջորդ մրցաշրջանը Մովսեսյանը դիմավորեց «Փյունիկում», որի կազմում նորամուտը շատ հաջող ստացվեց: ԲԿՄԱ-ի հետ մեկնարկային տուրում նա բացեց հաշիվը՝ դառնալով առաջնության անդրանիկ գոլի հեղինակը: Դա «Փյունիկի» կազմում Էդգարի անցկացրած 10 հանդիպումներում խփած միակ գոլն էր:
Առաջնության գարնանային հատվածը Մովսեսյանն անցկացրեց ԲԿՄԱ-ում, որի կազմում 4 գոլ խփեց ու Գրենիկ Պետրոսյանի հետ ճանաչվեց թիմի լավագույն ռմբարկու: Հետաքրքիր է, որ այդ գոլերից 3-ը նա խփեց իր նախկին թիմերին՝ մեկական անգամ գրավելով «Վանի», «Ուրարտուի» և «Նոայի» դարպասները:
Ընթացիկ մրցաշրջանում վերադառնալով «Վան», Էդգար Մովսեսյանը կրկին արդյունավետ խաղ է ցուցադրում: Հենց մեկնարկային տուրում «Լեռնային Արցախի» դարպասը նրա խփած միակ գոլի շնորհիվ «Վանը» հաղթեց: Իսկ Մովսեսյանը 2-րդ մրցաշրջանն անընդմեջ դարձավ առաջնության անդրանիկ գոլի հեղինակը:
10-րդ տուրում «Լեռնային Արցախի» դարպասը Մովսեսյանի խփած գոլը 5-րդն էր ընթացիկ առաջնությունում: Նա «Վանի» լավագույն ռմբարկուն է: Եվ կրկին Էդգարն աչքի է ընկել իր նախկին թիմերի հետ խաղերում՝ դուբլ ձևակերպելով ԲԿՄԱ-ի հետ մրցավեճում, մեկ գնդակ էլ խփելով «Նոային»:
24-ամյա ֆուտբոլիստը Fastex Հայաստանի Պրեմիեր լիգայում անցկացրած 87 հանդիպումներում 15 գոլ է խփել:
VNews-ը ներկայացնում է Fastex Հայաստանի Պրեմիեր լիգայում «Վանի» կազմում խփած գոլերի քանակով ամենաարդյունավետ ֆուտբոլիստների ցանկը:
|
Ֆուտբոլիստներ |
Գոլ |
|
1. Էդգար Մովսեսյան |
9 |
|
2. Ուիլֆրեդ Կուասի Էզա |
8 |
|
3. Զավեն Բադոյան |
5 |
|
4. Ջոսուե Գաբա |
3 |
|
5. Ստեֆան Աջումանի |
3 |
|
6. Վլադիմիր Ֆիլիպով |
3 |
|
7. Միհրան Մանասյան |
2 |
|
8. Վահագն Այվազյան |
2 |
|
9. Կախա Կախաբրիշվիլի |
2 |
|
10. Ջեյսոն Քլիֆորդ |
2 |
|
11. Ալեքսանդր Տենյաև |
2 |
|
12. Արտյոմ Բիլի |
2 |
