Հայաստանի ազգային հավաքականի պատմության գլխավոր ռմբարկու Հենրիխ Մխիթարյանը հերթական անգամ կոչով դիմել է ամբողջ աշխարհին:
«Տասը ամիս շրջափակումից հետո՝ սեպտեմբերի 19-ին, ադրբեջանական զինուժը սկսեց դաժան գնդակոծել Լեռնային Ղարաբաղը:
Սիրտս կոտրվում է, երբ տեղեկանում եմ Լեռնային Ղարաբաղից բռնի տեղահանված և զանգվածային արտագաղթով Հայաստան փախչող հազարավոր հայ ընտանիքների տրավմայի, կորստի ու մարդու իրավունքների կոպիտ խախտումների մասին:
Իրավիճակը, որի պատճառով մարդիկ այժմ տառապում են Լեռնային Ղարաբաղում, հիշողություններ են արթնացնում անցյալի ամենամութ ժամերից: Հաճախ կարեկցանքով հետհայացք ենք գցում անխտիր սպանությունների, էթնիկ զտումների ու համակենտրոնացման ճամբարների այդ մութ էջերին և ափսոսում, որ ոչ ոք բավարար ջանք չգործադրեց՝ այդ ամենը կանգնեցնելու համար:
Անցյալի վայրագություններից զոհվածներին մենք հետ բերել չենք կարող, բայց դեռ ժամանակ ունենք կանխելու ցեղասպանությունը Լեռնային Ղարաբաղում:
Այս սարսափի մեջ անհրաժեշտ է շտապ մարդասիրական օգնություն Լաչինի միջանցքով և միջազգային դիտորդական առաքելությունների տեղակայում՝ մարդկության դեմ ուղղված այս հանցագործությունները դադարեցնելու համար:
Միջազգային առաջնորդների՝ էթնիկ զտումների դեմ ոտքի կանգնելն ու հնարավոր բոլոր քաղաքական գործիքներն օգտագործելը հիմա խիստ անհրաժեշտ են՝ տարածաշրջանում ռազմական գործողություններին վերջ դնելու համար:
Երեխաներն իրենց հայրենիքում խաղաղ ապրելու իրավունք ունեն»,- գրել է Հենրիխ Մխիթարյանը:
