Vnews-ը ներկայացնում է արտերկրում հանդես եկող հայ ֆուտբոլիստների` առաջիկա օրերին սպասվող հանդիպումների ժամանակացույցը և հետաքրքիր տեղեկություններ։
Հենրիխ Մխիթարյան
Իտալիայի Ա Սերիա, 36-րդ տուր, «Ֆրոզինոնե» - «Ինտեր» (Մայիսի 10, 22:45)
Սկուդետոն նվաճելուց հետո Միլանի «Ինտերը» խաղում է հավելյալ հանգստությամբ և նախորդ տուրում 0-1 հաշվով պարտվեց փրկվելու համար պայքարող «Սասուոլոյին»:
Հենրիխ Մխիթարյանն Ա Սերիայի այս մրցաշրջանում մասնակցել է «Ինտերի» բոլոր հանդիպումներին: Հայ Կիսապաշտպանը խփել է 2 գոլ, կատարել է 8 ասիստ:
Ուգոչուկվու Իվու, Խորեն Բայրամյան
Ռուսաստանի Պրեմիեր լիգա, 28-րդ տուր, «Ռուբին» - «Ռոստով» (Մայիսի 11, 15:00)
«Ռուբինը» 38 միավորով 9-րդն է, իսկ «Ռոստովը» վաստակել է 40 միավոր և 7-րդ տեղում է:
Ուգոչուկվու Իվուն «Ռուբինի» կիսապաշտպանական գծի անփոխարինելի ֆուտբոլիստներից է: Հայաստանի հավաքականի կիսապաշտպանն ընթացիկ առաջնությունում մասնակցել է 25 հանդիպման ու խփել է 1 գոլ: Խորեն Բայրամյանն էլ մեկնարկային կազմի ֆուտբոլիստ է «Ռոստովում»: Հայ կիսապաշտպանն այս մրցաշրջանում 24 խաղում կատարել է 2 գոլային փոխանցում:
Տիգրան Բարսեղյան
Սլովակիայի առաջնություն, Չեմպիոնական խումբ, 8-րդ տուր, «Պոդբրեզովա» - «Սլովան» (Մայիսի 11, 17:30)
«Սլովանը» հերթական փայլուն մրցաշրջանն է անցկացնում և արդեն դարձել է երկրի չեմպիոն:
Հրաշալի տպավորություն է թողնում Տիգրան Բարսեղյանը, որը խփել է 12 գոլ ու կատարել է 11 գոլային փոխանցում: Բարսեղյանը գլխավորում է Սլովակիայի առաջնության ռմբարկուների անվանացանկը: 12 գոլ է խփել նաև «Բանսկա Բիստրիցայի» հարձակվող Ռոբերտ Պոլիևկան:
Սարգիս Ադամյան
Գերմանիայի Բունդեսլիգա, 33-րդ տուր, «Քյոլն» - «Ունիոն Բեռլին» (Մայիսի 11, 17:30)
«Քյոլնը» 32 խաղից հետո ունի 24 միավոր ու 17-րդն է: «Այծերը» Գերմանիայի վերնախավային առաջնությունում մնալու տեսական շանսեր պահպանում են: «Ունիոն Բեռլինը» 30 միավորով 15-րդն է:
Սարգիս Ադամյանը «Քյոլնի» կազմում այս մրցաշրջանում խփել է 1 գոլ, կատարել է 2 արդյունավետ փոխանցում:
Էդուարդ Սպերցյան, Գեորգի Հարությունյան
Ռուսաստանի առաջնություն, 28-րդ տուր, «Սպարտակ» - «Կրասնոդար» (Մայիսի 11, 17:30)
«Կրասնոդարը» պայքարում է չեմպիոնության համար ու առաջատար «Զենիթից» հետ է մնում 1 միավորով:
Էդուարդ Սպերցյանն այս մրցաշրջանում խփել է 10 գոլ, կատարել է 4 արդյունավետ փոխանցում: Գեորգի Հարությունյանը վերջին անգամ «Կրասնոդարի» գլխավոր թիմի կազմում դաշտ դուրս եկել է մարտի 12-ին՝ «Խիմկիի» դեմ Ռուսաստանի գավաթի խաղարկության 1/16 եզրափակիչի խաղում:
Էդգար Սևիկյան
Հունգարիայի առաջնություն, 32-րդ տուր, «Դիոշդյոր» - «Ֆերենցվարոշ» (Մայիսի 11, 21:30)
Դեյան Ստանկովիչի գլխավորած «Ֆերենցվարոշը» վաղուց ապահովել է առաջին տեղն ու այժմ ձգտում է չպարտվել 15-րդ խաղն անընդմեջ:
«Ֆերենցվաշորի» ապրիլի լավագույն ֆուտբոլիստ ճանաչված Էդգար Սևիկյանն առաջին գոլը հունգարական թիմում խփել է հենց «Դիոշդյորի» դեմ խաղում:
Ստյոպա Մկրտչյան
Խորվաթիայի առաջնություն, 34-րդ տուր, «Դինամո Զագրեբ» - «Օսիեկ» (Մայիսի 11, 21:30)
«Օսիեկը» 51 միավորով 4-րդն է ու 4 միավորի առավելություն ունի «Լոկոմոտիվայից»: Թիմը ձգտում է նվաճել Կոնֆերենցիաների լիգայի որակավորման փուլի ուղեգիր:
Ստյոպա Մկրտչյանը Խորվաթիայի առաջնությունում անցկացրել է 12 հանդիպում ու խփել է 1 գոլ: Մկրտչյանը մասնակցել է թիմերի միջև կայացած առաջին հանդիպմանն ու օգնել է «Օսիեկին» միավոր վաստակել երկրի չեմպիոնի դեմ խաղում (1:1):
Վահան Բիչախյան
Լեհաստանի առաջնություն, 32-րդ տուր, «Ռակուվ» - «Պոգոն» (Մայիսի 11, 22:00)
«Պոգոնը» 51 միավորով 4-րդն է ու 1 միավորով է հետ մնում «Լեխից»:
Վահան Բիչախչյանը «Պոգոնի» վերջին 6 խաղերից 4-ում եղել է մեկնարկային կազմում: Հայաստանի հավաքականի ֆուտբոլիստն ընթացիկ առաջնությունում խփել է 5 գոլ ու կատարել է 4 արդյունավետ փոխանցում:
Տիգրան Ավանեսյան
Ռուսաստանի Պրեմիեր լիգա, 28-րդ տուր, «Բալթիկա» - «Դինամո Մոսկվա» (Մայիսի 11, 22:30)
«Բալթիկան» 26 միավորով 15-րդ տեղում է: Կալինինգրադի թիմը պայքարում է Ռուսաստանի Պրեմիեր լիգայում մնալու համար: Ապահով 12-րդ տեղում է «Օրենբուրգը», որն ունի 29 միավոր:
Տիգրան Ավանեսյանը Ռուսաստանի Պրեմիեր լիգայի այս մրցաշրջանում անցկացրել է 6 հանդիպում: Հայ կիսապաշտպանն ընթացիկ առաջնությունում արդյունավետ գործողություն չի կատարել, բայց Ռուսաստանի գավաթի խաղարկության կիսաեզրափակիչում գոլ է խփել «Ռոստովի» դեմ խաղում և օգնել է իր թիմին դուրս գալ եզրափակիչ:
Նաիր Թիկնիզյան
Ռուսաստանի Պրեմիեր լիգա, 28-րդ տուր, «Օրենբուրգ» - «Լոկոմոտիվ» (Մայիսի 12, 15:00)
Մոսկվայի «Լոկոմոտիվը» 27 խաղից հետո վաստակել է 44 միավոր ու 4-րդն է:
Նաիր Թիկնիզյանը ՌՊԼ-ի ընթացիկ մրցաշրջանում 20 խաղում խփել է 6 գոլ և կատարել է 3 գոլային փոխանցում:
Վարազդատ Հարոյան
Չինաստանի Սուպերլիգա, 11-րդ տուր, «Շենժեն» - «Ցինդաո Ուեսթ Քոսթ» (Մայիսի 12, 16:00)
«Ցինդաոն» 10 խաղից հետո վաստակել է 9 միավոր և 11-րդ տեղում է:
Հայաստանի հավաքականի ավագ Վարազդատ Հարոյանը Չինաստանի ընթացիկ առաջնության 9 խաղում ստացել է 2 դեղին ու 1 կարմիր քարտ:
Անդրե Կալիզիր
Շվեդիայի առաջնություն, 8-րդ տուր, «Վեռնամո» - «Բրոմապոյկարնա» (Մայիսի 12, 18:30)
«Բրոմապոյկարնան» 7 խաղից հետո ունի 9 միավոր ու 10-րդ տեղում է:
Հայաստանի հավաքականի պաշտպան Անդրե Կալիզիրը նախորդ երկու խաղերում եղել է «Բրոմապոյկարնայի» մեկնարկային կազմում:
Նորբերտո Բրիասկո Բալեկյան
Արգենտինայի առաջնություն, 1-ին տուր «Աթլետիկո Տուկուման» - «Բոկա Խունիորս» (Մայիսի 13, 03:15)
Բրիասկո Բալեկյանը «Բոկա Խունիորսի» վերջին 10 հանդիպումներից միայն 3-ին է մասնակցել:
Նարեկ Գրիգորյան
Ռումինիայի առաջնություն, Չեմպիոնական խումբ, 9-րդ տուր, «Ֆարուլ» - «Կրայովա» (Մայիսի 13, 21:30)
«Ֆարուլը» 35 միավորով 4-րդ տեղում է ու 5 միավորով հետ է մնում «Կլուժից» ու «Կրայովայից»:
Նարեկ Գրիգորյանը մասնակցել է «Սեպսիի» դեմ Ռումինիայի առաջնության նախորդ տուրի հանդիպմանը: 22-ամյա կիսապաշտպանն այս մրցաշրջանում կատարել է 4 գոլային փոխանցում:
