Արգենտինացի մասնագետ Մարսելո Գալյարդոն հեռացվել է Սաուդյան Արաբիան ներկայացնող «Ալ Իթիհադի» գլխավոր մարզիչի պաշտոնից:
Ակումբի նախագահ Լուայ Նազերը հայտնել է, որ 48-ամյա մասնագետը լուրջ սխալ է թույլ տվել՝ պահանջելով թիմից հեռացնել 2022 թվականի «Ոսկե գնդակի» դափնեկիր, ֆրանսիացի հարձակվող Կարիմ Բենզեմային:
«Գալյարդոն լուրջ սխալ թույլ տվեց, երբ խնդրեց Բենզեմային հեռացնել, ինչն անընդունելի է: Կարիմը Սաուդյան Արաբիայի նախագծի և ակումբի անբաժանելի մասն է:
Ինչ վերաբերում է նոր մարզիչին, ապա մենք ունենք 2-3 թեկնածու»,- հայտնել է ակումբի նախագահը հեղինակավոր ֆուտբոլային ինսայդեր Ֆաբրիցիո Ռոմանոյին:
Հիշեցնենք, որ Գալյարդոն «Ալ Իթիհադը» գլխավորում էր նախորդ տարվա նոյեմբերից: Ավարտված մրցաշրջանում թիմը Սաուդյան Արաբիայի Պրո լիգայում գրավել էր 5-րդ տեղը: «Ալ Իթիհադը» 2022/2023 մրցաշրջանում դարձել էր Սաուդյան Արաբիայի չեմպիոն:
