«Արարատի» հետ հանդիպման երկրորդ խաղակեսում խաղադաշտ դուրս եկած Մարիուս Նուբիսին դուբլի հեղինակ դառնալով ոչ միայն հաղթանակ պարգևեց «Փյունիկին», այլև միանգամից արդյունավետության տարիքային 3 ռեկորդ սահմանեց: Դրանցից երկուսը վերաբերում է «Փյունիկին»:

Կամերունցի ֆուտբոլիստն ինքն իրեն հիանալի նվեր մատուցեց ծննդյան 29-ամյակի առթիվ, որը նշել էր խաղից երկու օր առաջ՝ նոյեմբերի 28-ին: Ընթացիկ առաջնությունում Նուբիսին գոլերի թիվը հասցրեց 6-ի և գերազանցեց թիմի նախկին ֆուտբոլիստ Գեղամ Հովհաննիսյանի արդյունավետության տարիքային ռեկորդը: Վերջինս «Փյունիկում» խաղացած ֆուտբոլիստներից 29 տարեկանում բոլորից շատ գոլ էր խփել՝ 1996թ. 5 անգամ գրավելով մրցակիցների դարպասները:

29-ամյա Նուբիսիի արդյունքը լավագույնն է նաև «Փյունիկի» լեգեոնականների մեջ: Նախկին ռեկորդակիրը Լուկաս Վիլյելան էր, որն այդ տարիքում 2023թ. օրացուցային տարում առաջնության հանդիպումներում 4 գոլ էր խփել:

Նուբիսիի արդյունավետության տարիքային 3-րդ ռեկորդը վերաբերում է ՀՀ առաջնություններում հանդես եկած լեգեոնականներին: 2025թ. օրացուցային տարում Նուբիսին առաջնության հանդիպումներում ընդհանուր առմամբ 16 գոլ է խփել: Գոլերից 10-ը նրա հաշվին գրանցվել էր նախորդ առաջնության գարնանային հատվածում «Արարատ-Արմենիայի» կազմում:

«Փյունիկի» հարձակվողը գերազանցեց Յուսուֆ Օտուբանջոյի արդյունավետության տարիքային ռեկորդը: Վերջինս 29 տարեկանում ՀՀ առաջնություններում լեգեոնականներից բոլորից արդյունավետ է գործել՝ 2021թ. օրացուցային տարում «Արարատ-Արմենիայի» կազմում դառնալով 15 գոլի հեղինակ:

«Փյունիկի» ֆուտբոլիստների արդյունավետության տարիքային 25 ռեկորդներից 12-ը սահմանվել են 1990-ականներին անցկացված առաջնություններում և մինչև օրս գերազանցված չեն: Տարիքային ռեկորդների քանակով առջևում Հայաստանի առաջնություններում «Փյունիկի» գլխավոր ռմբարկու Արսեն Ավետիսյանն է: Նա տարիքային 4 ռեկորդի հեղինակ է:

Ավետիսյանին է պատկանում մեկ մրցաշրջանի արդյունավետության բացարձակ ռեկորդը: 1994թ. առաջնությունում նա 39 գոլի հեղինակ էր դարձել: Այդ արդյունքը լավագույնն էր նաև եվրոպական առաջնությունների ռմբարկուների մեջ: Եվ եթե «Ոսկե խաղակոշիկ» մրցանակի խաղարկությունը 1992-1996թթ. դադարեցված չլիներ, ապա այն կհանձնվեր հայ ֆուտբոլիստին:

Տարիքային 4 ռեկորդի հեղինակ էր նաև Գեղամ Հովհաննիսյանը, որի ցուցանիշներից մեկը գերազանցեց Մարիուս Նուբիսին: Ռեկորդակիրների ցանկում իր արժանի տեղն ունի նաև հայկական ֆուտբոլի լավագույն ներկայացուցիչներից մեկը՝ Խորեն Հովհաննիսյանը, որը 1992թ. Հայաստանի անդրանիկ առաջնությունում խաղացող-մարզչի կարգավիճակով 37 տարեկանում 17 գոլ էր խփել: Հաջորդ մրցաշրջանում նրա խփած 5 գոլը ևս ռեկորդային ցուցանիշ է 38 տարեկանների համար:

FastNews-ը ներկայացնում է «Փյունիկի» ֆուտբոլիստների արդյունավետության տարիքային ռեկորդները: