Մադրիդի «Ռեալի» ղեկավարությունը չի պատրաստվում պատժել բրազիլացի վինգեր Վինիսիուսին, հաղորդում է Marca-ն:

Վինիսիուսն «Էլ Կլասիկոյում»՝ 72-րդ րոպեին փոխարինվելուց հետո, ձեռքսեղմում չէր ունեցել գլխավոր մարզիչ Չաբի Ալոնսոյի հետ, ագրեսիվ կերպով շտապել էր հանդերձարան, բայց հետո վերադարձել էր պահեստայինների գոտի:

Ակումբի ղեկավարությունը դժգոհ է եղել խաղացողի արձագանքից, բայց որոշել է, որ դա նրա և Ալոնսոյի միջև քննարկվելիք հարց է: Իսպանացի մասնագետը խաղից հետո ասել էր, որ առանձնազրույց կունենա Բրազիլիայի հավաքականի ֆուտբոլիստի հետ:

Ակումբի ղեկավարների համար այս միջադեպի վերաբերյալ հարցը փակվել է այն հանգամանքից հետո, որ բրազիլացին րոպեներ անց վերադարձել է պահեստայինների նստարան, իսկ հետո թիմի հետ բարձր տրամադրությամբ տոնել է հաղթանակը:

Հիշեցնենք, որ մադրիդցիները «Սանտիագո Բեռնաբեու» ստադիոնում 2-1 հաշվով հաղթել էին գործող չեմպիոնին:

Լա լիգայի հանդիպումները ցուցադրվում են «Ֆասթ Սպորտ» հեռուստաալիքների («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ուղիղ եթերում: Բոլոր խաղերը հեռարձակվում են Fast TV հավելվածում (iOS, Android):