Անգլիական «Մանչեսթեր Յունայթեդը» սկանդալի կենտրոնում հայտնված բրազիլացի վինգեր Անտոնիին թույլ է տվել մասնակցել թիմային մարզումներին։ Չի բացառվում, որ վերջինս հնարավորություն կստանա մասնակցել «Կարմիր սատանաների» առաջիկա հանդիպմանը, որում անգլիական գրանդը սեպտեմբերի 30-ին կմրցի «Քրիսթալ Փելասի» հետ,- այս մասին հայտնում են անգլիական լրատվականները։
23-ամյա ֆուտբոլիստը հայտնվել էր սկանդալի կենտրոնում այն բանից հետո, երբ նախկին ընկերուհի Գաբրիելա Կավալինն իր նկատմամբ բռնություն գործադրելու համար դիմել էր ոստիկանություն:
Միջադեպից հետո ֆուտբոլիստը ժամանակավորապես զրկվել էր «Մանչեսթեր Յունայթեդի» կազմում մարզվելու հնարավորությունից և հեռացվել էր Բրազիլիայի հավաքականից:
Սան Պաուլուի և Մանչեսթերի ոստիկանությունը Կավալինի նկատմամբ բռնություն գործադրելու 4 դեպքով շարունակում է հետաքննությունը:
Ավելի վաղ 33-ամյա բանկիր Ինգրիդ Լանան նույնպես հանդես էր եկել նման մեղադրանքով: Երրորդ ենթադրյալ զոհն էլ Ռայսա դե Ֆրեյտասն է, որը հետ է վերցրել ցուցմունքը:
Հիշեցնենք, որ Անտոնին 2022 թվականի ամռանն է 95 միլիոն եվրոյի դիմաց Ամստերդամի «Այաքսից» տեղափոխվել «Մանչեսթեր Յունայթեդ»: Ընթացիկ մրցաշրջանում բրազիլացին անգլիական թիմի կազմում մասնակցել է 4 հանդիպման և ոչ մի արդյունավետ գործողությամբ աչքի չի ընկել:
