Չեմպիոնների լիգայի նորընծա գավաթակիր «Մանչեսթեր Սիթին» հետաքրքրված է կատալոնական «Բարսելոնայի» կիսապաշտպան Ռաֆինյայի ծառայություններով, հաղորդում է FootMercato-ն:
Անգլիայի չեմպիոնը 26-ամյա բրազիլացուն դիտարկում է որպես ալժիրցի կիսապաշտպան Ռիյադ Մահրեզին փոխարինողի, որը կարող է կարիերան շարունակել Սաուդյան Արաբիայում: «Մանչեսթեր Սիթիի» մարզական տնօրենն արդեն կապ է հաստատել Ռաֆինյայի ներկայացուցչի հետ:
Հիշեցնենք, որ Ռաֆինյան «Բարսելոնայում» խաղում է 2022 թվականի հուլիսից: 2022/23 մրցաշրջանում նա կատալոնական ակումբի կազմում մասնակցել է 42 խաղի, խփել 10 գոլ, կատարել 12 գոլային փոխանցում: Transfermarkt-ը 60 միլիոն եվրո է գնահատում նրա տրանսֆերային արժեքը:
