«Մանչեսթեր Սիթին» չորրորդ անգամ անընդմեջ դարձավ Անգլիայի չեմպիոն` Պրեմիեր լիգայի վերջին` 38-րդ տուրում տանը 3-1 հաշվով հաղթելով Լոնդոնի «Վեսթ Հեմին»։

Պեպ Գվարդիոլայի գլխավորած թիմի չեմպիոնությանն ու հաղթանակին մեծապես նպաստեց անգլիացի կիսապաշտպան Ֆիլ Ֆոդենի դուբլը։ «Սիթիից» մեկ գոլ էլ խփեց իսպանացի կիսապաշտպան Ռոդրին։

«Մանչեսթեր Սիթին» առաջնությունն ավարտեց 91 միավորով և երկրորդ տեղը զբաղեցրած Լոնդոնի «Արսենալից» առաջ անցավ 2 միավորով։ «Զինագործները» վերջին տուրում 2-1 հաշվով հաղթեցին «Էվերթոնին»։

«Լիվերպուլը» Յուրգեն Կլոպի գլխավորությամբ անցկացրեց վերջին հանդիպումը և սեփական մարզադաշտում 2-0 հաշվով հաղթեց «Վուլվերհեմփթոնին»։ Մերսիսայդյան ակումբը 82 միավորով առաջնությունն ավարտեց երրորդ տեղում։

Բացի «Մանչեսթեր Սիթիից», «Արսենալից» ու «Լիվերպուլից», հաջորդ մրցաշրջանում Անգլիան Չեմպիոնների լիգայում կներկայացնի նաև Բիրմինգհեմի «Ասթոն Վիլան», որը 68 միավորով եզրափակեց լավագույն քառյակը։

«Տոտենհեմը» վերջին տուրում 3-0 հաշվով հաղթեց «Շեֆիլդ Յունայթեդին», 66 միավորով առաջնությունն ավարտեց 5-րդ տեղում և նվաճեց Եվրոպա լիգայի, իսկ 6-րդ տեղը զբաղեցրած «Չելսին» (63 միավոր)` Կոնֆերենցիաների լիգայի ուղեգիր։

Եթե Անգլիայի գավաթի խաղարկության եզրափակիչում «Մանչեսթեր Սիթին» հաղթի «Մանչեսթեր Յունայթեդին», ապա «Չելսին» նույնպես կնվաճի Եվրոպա լիգայի ուղեգիր, իսկ 7-րդ տեղը զբաղեցրած «Նյուքասլը» հանդես կգա Կոնֆերենցիաների լիգայում։ Հակառակ դեպքում 8-րդ տեղը զբաղեցրած «Մանչեսթեր Յունայթեդը» կխաղա Եվրոպա լիգայում։

Պրեմիեր լիգայից դուրս մնացին և հաջորդ մրցաշրջանում երկրորդ լիգայում` Չեմպիոնշիփում հանդես կգան «Լութոն Թաունը», «Բարնլին» և «Շեֆիլդ Յունայթեդը»։

Պրեմիեր լիգա, 38-րդ տուր

«Մանչեսթեր Սիթի» - «Վեսթ Հեմ»` 3-1 

Ֆիլ Ֆոդեն, 2, 18, Ռոդրի, 59 - Մոհամեդ Քուդուս, 42

«Արսենալ» - «Էվերթոն»` 2-1 

Տակեհիրո Տոմիյասու, 43, Կայ Հավերց, 89 - Իդրիսա Գեյե, 40

«Լիվերպուլ» - «Վուլվերհեմփթոն»` 2-0 

Ալեքսիս Մաքալիսթեր, 34, Ջարեդ Քվանսա, 40

Հեռացում` Նելսոն Սեմեդու («Վուլվերհեմփթոն»), 28
«Քրիսթալ Փելաս» - «Ասթոն Վիլա»` 5-0 

Ժան-Ֆիլիպ Մատետա, 9, 39, 64, Էբերեչի Էզե, 54, 69

«Շեֆիլդ Յունայթեդ» - «Տոտենհեմ»` 0-3

Դեյան Կուլուսևսկի, 14, 65, Պեդրո Պոռո, 59

«Չելսի» - «Բորնմութ»` 2-1 

Մոյզես Կայսեդո, 17, Ռահիմ Սթերլինգ, 48 - Բենուա Բադիաշիլ, 49 (ինքնագոլ)

«Լութոն Թաուն» - «Ֆուլհեմ»` 2-4 

Կարլթոն Մորիս, 45+1 (11մ), Ալֆի Դաութի, 55 - Ադամա Տռաորե, 43, Ռաուլ Խիմենես, 45+3, 49, Հարի Վիլսոն, 68

«Բրենթֆորդ» - «Նյուքասլ»` 2-4

 Վիտալի Յանելթ, 48, Յոհան Վիսա, 70 - Հարվի Բարնս, 21, Ջեյքոբ Մերֆի, 36, Ալեքսանդր Իսակ, 38, Բրունո Գիմարայես, 77

«Բարնլի» - «Նոթինգհեմ Ֆորեսթ»` 1-2 

Ջոշ Կալեն, 72 - Քրիս Վուդ, 2, 14

«Բրայթոն» - «Մանչեսթեր Յունայթեդ»` 0-2 (տեսանյութ)

Դիոգու Դալոտ, 73, Ռասմուս Հոյլուն, 88