Միլանի «Ինտերի» արգենտինացի հարձակվող Լաուտարո Մարտինեսը հիանալի գոլային պահ բաց թողեց «Սամպդորիայի» դեմ Իտալիայի առաջնության 22-րդ տուրի արտագնա խաղի վերջին վայրկյաններին:
Ավելացված 5-րդ րոպեին աշխարհի նորընծա չեմպիոնը, մրցակցի տուգանային հրապարակում ստանալով իտալացի պաշտպան Ֆեդերիկո Դիմարկոյի փոխանցումը, հապաղեց և չկարողացավ հարվածել գնդակին՝ բաց թողնելով միլանյան գրանդին հաղթանակ պարգևելու հիանալի հնարավորությունը:
Հիշեցնենք, որ հանդիպումը գոլազուրկ ավարտ ունեցավ: Հայաստանի ազգային հավաքականի նախկին կիսապաշտպան Հենրիխ Մխիթարյանը միլանյան ակումբի մեկնարկային կազմում էր և փոխարինվեց 90-րդ րոպեին։
Ընթացիկ մրցաշրջանում Լաուտարո Մարտինեսն «Ինտերի» կազմում անցկացրած 32 խաղում խփել է 15 գոլ ու կատարել 7 ասիստ:
