Լա լիգայի 27-րդ տուրի «Խետաֆե» - «Աթլետիկո Մադրիդ» խաղի ընթացքում կարմիր քարտ ստացած Անխել Կորեան որակազրկվել է 5 խաղով, գրում է AS-ը:
«Աթլետիկոյի» հարձակվողը հեռացվել էր դաշտից ոչ միայն մրցակցի պաշտպան Ջենեի հետ պայքարում կոպիտ խաղի, այլ նաև հանդիպման մրցավար Գիլյերմո Կուադրա Ֆեռնանդեսի հասցեին վիրավորական արտահայտություններ հնչեցնելու համար:
Խաղից հետո արգենտինացին սոցիալական ցանցերի իր էջում ներողություն էր խնդրել մրցավարից՝ նշելով, որ հարգում է բոլոր մրցավարներին ու զղջում իր պահվածքի համար:
Այդուհանդերձ, Լա լիգայի կարգապահական կոմիտեն որոշում է կայացրել խիստ պատիժ սահմանել՝ որակազրկելով ֆուտբոլիստին 5 խաղով:
