Անտոնիո Կոնտեն, հանուն «Նապոլին» գլխավորելու, համաձայնել է նվազեցնել ֆինանսական պահանջները, հայտնում է լրագրող Ջանլուկա Դի Մարցիոյի կայքը։
Ըստ աղբյուրի` իտալացի մարզիչը բանակցություններ է վարում ակումբի նախագահ Աուրելիո Դե Լաուրենտիսի հետ։ Ֆունկցիոները Կոնտեի տաղանդի մեծ երկրպագուն է և անչափ բարձր է գնահատում նրա պրոֆեսիոնալիզմն ու աշխատասիրությունը։
Ավելի վաղ հայտնի էր դարձել, որ Կոնտեին գլխավոր մարզիչ են ցանկանում նշանակել նաև «Միլանն» ու Լոնդոնի «Չելսին»։
54-ամյա մարզչի վերջին աշխատավայրը եղել է Լոնդոնի «Տոտենհեմում», որտեղից հեռացել է 2023 թ. մարտին։
«Նապոլիի» գլխավոր մարզչի պաշտոնն այժմ թափուր է։ Այս տարվա փետրվարին ժամանակավոր պաշտոնակատար նշանակված Ֆրանչեսկո Կալցոնան իտալական Ա սերիայի վերջին` 38-րդ տուրի «Լեչեի» դեմ տնային խաղից հետո լքելու է ակումբը։
