ՈւԵՖԱ-ի պաշտոնական կայքը հայտնել է Fastex Հայաստանի Պրեմիեր լիգայի փոխչեմպիոն «Փյունիկի», բրոնզե մեդալակիր «Արարատ-Արմենիայի» և լավագույն քառյակը եզրափակած «Ալաշկերտի» խաղերի ժամանակացույցը Կոնֆերենցիաների լիգայի որակավորման երկրորդ փուլում:
«Փյունիկը» որակավորման երկրորդ փուլում կմրցի շվեդական «Կալմարի» հետ: Դիմակայության առաջին խաղը տեղի կունենա հուլիսի 27-ին Շվեդիայում, կմեկնարկի Երևանի ժամանակով 21:00-ին, իսկ պատասխան հանդիպումը մեկ շաբաթ անց կանցկացվի Աբովյանի քաղաքային ստադիոնում, մեկնարկը՝ 19:00-ին:
Եղիշե Մելիքյանի գլխավորած թիմը որակավորման առաջին փուլում հաղթահարել էր Էստոնիայի գավաթակիր «Նարվա Տրանսի» արգելքը (2-0, 3-0):
«Արարատ-Արմենիան» որակավորման երկրորդ փուլում կմրցի հունական «Արիսի» հետ: Դիմակայության առաջին խաղը տեղի կունենա հուլիսի 27-ին ՀՖՖ Տեխնիկական կենտրոն/ֆուտբոլի ակադեմիայում և կմեկնարկի ժամը 19:00-ին, պատասխան հանդիպումը մեկ շաբաթ անց կանցկավի Հունաստանում և կմեկնարկի Երևանի ժամանակով 22:15-ին:
Վարդան Մինասյանի գլխավորած թիմը որակավորման առաջին փուլում հաղթահարել էր ալբանական «Էգնատիայի» արգելքը (1-1, 4-4, 11մ՝ 4-2):
«Ալաշկերտը» որակավորման երկրորդ փուլում կմրցի հունգարական «Դեբրեցենի» հետ: Դիմակայության առաջին խաղը տեղի կունենա հուլիսի 27-ին Երևանի «Ուրարտու» ստադիոնում ու կմեկնարկի ժամը 19:00-ին, պատասխան հանդիպումը մեկ շաբաթ անց կանցկացվի Հունգարիայում, մեկնարկը՝ Երևանի ժամանակով 23:00-ին:
Վահե Գևորգյանի գլխավորած թիմը որակավորման առաջին փուլում հաղթահարել էր չեռնոգորական «Արսենալ Տիվատի» արգելքը (1-1, 6-1):
Հիշեցնենք, որ Կոնֆերենցիաների լիգայի որակավորման երկրորդ փուլում կխաղա նաև Հայաստանի նորընծա չեմպիոն և գավաթակիր «Ուրարտուն», որը կմրցի ռումինական «Ֆարուլի» հետ: Առաջին խաղը տեղի կունենա հուլիսի 27-ին Ռումինիայում և կմեկնարկի Երևանի ժամանակով 21:00-ին, իսկ պատասխան հանդիպումը մեկ շաբաթ անց կանցկացվի «Ուրարտու» ստադիոնում ու կմեկնարկի ժամը 19:00-ին:
Դմիտրի Գունկոյի գլխավորած թիմը եվրագավաթներում պայքարը սկսել էր Չեմպիոնների լիգայում և որակավորման առաջին փուլում երկխաղյա դիմակայությունում պարտվել բոսնիական «Զրինսկիին» (0-1, 3-2, 11մ՝ 3-4): Ռումինիայի չեմպիոն «Ֆարուլը» նույնպես պայքարը սկսել էր գլխավոր եվրագավաթում և պարտվել Տիրասպոլի «Շերիֆին» (1-0, 0-3):
