Ֆուտբոլի Կոնֆերենցիաների լիգայի որակավորման երկրորդ փուլում Հայաստանը կունենա չորս ներկայացուցիչ։ Հայտնի է հայկական ակումբների խաղերի ժամանակացույցը։

Հայաստանի չեմպիոն Երևանի «Փյունիկը» Չեմպիոնների լիգայից դուրս մնալուց հետո Կոնֆերենցիաների լիգայի որակավորման երրորդ փուլի ուղեգիրը կվիճարկի հյուսիսմակեդոնական «Ստրուգայի» հետ։ Առաջին հանդիպումը հուլիսի 24-ին կկայանա Հյուսիսային Մակեդոնիայի չեմպիոնի խաղադաշտում ու կմեկնարկի Երևանի ժամանակով 19։00-ին։

Հայաստանի գավաթակիր «Արարատ-Արմենիան» եվրագավաթում պայքարը կսկսի մոլդովական «Զիմբրուի» հետ արտագնա դիմակայությամբ։ Առաջին խաղը Մոլդովայում կկայանա հուլիսի 25-ին՝ Երևանի ժամանակով 20:45-ից սկսած։

Հայաստանի փոխչեմպիոն «Նոան» հյուսիսմակեդոնաական «Շկենդիայի» արգելքը հաղթահարելուց հետո որակավորման երկրորդ փուլում կմրցի Մալթան ներկայացնող «Սլիմա Ուոնդերերսի» դեմ։ Առաջին հանդիպումը կլինի տնային, կկայանա հուլիսի 25-ին Աբովյանի Վահագն Թումասյանի անվան ստադիոնում ու կմեկնարկի ժամը 20։00-ին։

Երևանի «Ուրարտուն» էլ էստոնական «Կալևին» երկու անգամ հաղթելուց (2-1, 2-0) հետո երկխաղյա դիմակայություն կանցկացնի չեխական «Բանիկ Օստրավայի» հետ: Առաջին մրցավեճը նախատեսված է հուլիսի 25-ին Չեխիայում ու կմեկնարկի Երևանի ժամանակով 21։00-ին։

Բոլոր զույգերի պատասխան խաղերը կկայանան օգոստոսի 1-ին։