Ֆրանսիական «Լիոնի» հարձակվող Ժորժ Միկաուտաձեն զինված կողոպուտի է ենթարկվել:
Actu Lyon-ը գրում է, որ միջադեպը տեղի է ունեցել Վրաստանի հավաքականի ֆուտբոլիստի տան դիմաց: 24-ամյա խաղացողին մոտեցել է երկու տղամարդ և սկսել սպառնալ նրան: Նրանցից մեկը զինված է եղել:
Հափշտակողները Միկաուտաձեից վերցրել են ժամացույցը և այլ թանկարժեք իրեր, ինչից հետո հեռացել են:
Միկաուտաձեն մարմնական վնասվածք չի ստացել: Նրան հասցված վնասը գնահատվում է 150-200 հազար եվրո: Ոստիկանությունն արդեն փնտրում է կողոպտիչներին:
