Սամարայի «Կռիլյա Սովետովի» կիսապաշտպան, Հայաստանի ազգային հավաքականի թեկնածու Ալեքսանդր Կովալենկոն Գռոզնիի «Ախմատի» դեմ Ռուսաստանի Պրեմիեր լիգայի 7-րդ տուրի խաղում (2-1) հաղթական գոլի հեղինակ դառնալուց հետո պատասխանել է ակումբի մամուլի ծառայության հարցերին:
- Սաշա, ՌՊԼ-ում առաջին գոլդ հաղթական էր։ Շնորհավորում եմ: պատմիր՝ ի՞նչ էմոցիաներ ունես հիմա:
- Շնորհակալություն, հաճելի էր առաջին գոլը խփել Պրեմիեր լիգայում: Շնորհակալ եմ թիմակիցներիս, բոլոր տղաները շնորհավորեցին։ Ամենակարևորը, իհարկե, այն է, որ երեք միավոր վաստակեցինք։ Կարևոր խաղ էր, «Ախմատն» ուժեղ մրցակից է։
- Շատ պայքար կար՝ դեղին և կարմիր քարտեր։ Կո՞պիտ խաղ էր:
-Այո՛, «Ախմատը» մարտական թիմ է։ Դաշտը բարձր էր ու չոր։ Այստեղ ամեն ինչ ուղղված էր պայքարին: Խաղից առաջ Սերգեյ Ալեքսանդրովիչ Կորնիլենկոն ինձ ասել էր, որ ավելի հաճախ հարվածեմ դարպասին։ Ես հարվածեցի և գոլ խփեցի։ Նման մի բան (ժպտում է):
- Թիմն այժմ շատ խիտ գրաֆիկ ունի, առջևում «Սպարտակի» դեմ խաղն է։ Կկարողանա՞ թիմը վերականգնվել։
- Ես բաց կթողնեմ այդ խաղը, քանի որ որակազրկված եմ։ Կարծում եմ, որ տղաները նորմալ կխաղան։ Ես հավատում եմ նրանց։
Հիշեցնենք, որ 19-ամյա ֆուտբոլիստն «Արարատ-73»-ի լեգենդ Ալեքսանդր Կովալենկոյի թոռն է: Նրա տրանսֆերային իրավունքը պատկանում է ռուսական «Սոչիին»։


