Կատարի շեյխ Ջասիմա բին Համադ Ալ Թանիի պատվիրակությունը մարտի 16-ին այցելել է «Օլդ Թրաֆորդ» ստադիոն և անգլիական «Մանչեսթեր Յունայթեդի» սեփականատերերի հետ քննարկել ակումբի վաճառքը, հայտնում է The Sun-ը:
Կողմերի միջև քննարկումն ընթացել է կառուցողական մթնոլորտում: Ալ Թանին պատրաստվում է Գլեյզերների ընտանիքին վճարել ավելի քան 5.5 միլիարդ դոլար, ինչպես նաև փակել ակումբի պարտքն ու ֆինանսավորել տնային ստադիոնի վերակառուցումը:
Կատարցիների կողմից բանակցություններին ներկա են գտնվել Nine Two Foundation-ի նախագահ Շահզադ Շահբազն ու Bank of America-ի գործադիր տնօրեն Յասիր Շախը: Նրանց ուղեկցել են Macfarlanes միջազգային իրավաբանական ընկերության որոշ իրավաբաններ:
Պոտենցիալ գնորդները պատրաստ են «Մանչեսթեր Յունայթեդի» գլխավոր մարզիչ Էրիկ տեն Հագին տրամադրել ահռելի տրանսֆերային բյուջե, որն անգլիական ակումբին կվերադարձնի նախկին փառքին:
Հիշեցնենք, որ 2011 թվականին Ալ Թանին արդեն փորձել է գնել ակումբի բաժնետոմսերը, սակայն ստացել է մերժում: Նույն տարում կատարցիները գնել են ֆրանսիական ՊՍԺ-ի 70 տոկոս բաժնեմասը:
«Մանչեսթեր Յունայթեդը» ցանկանում է գնել նաև Ջիմ Ռեթքլիֆը, որը Մեծ Բրիտանիայի ամենահարուստ մարդկանցից մեկն է և ակումբի վաղեմի երկրպագուն:
