«Ռեալի» անգլիացի կիսապաշտպան Ջուդ Բելինգեմը բաց է թողել սեպտեմբերի 22-ին կայացած մարզումը, տեղեկացնում է ակումբի պաշտոնական կայքը:
20-ամյա խաղացողը ստամոքսի խնդիրներ է ունեցել ու չի մարզվել ընդհանուր խմբի հետ: Դանի Կարվախալը մարզվել է մարզասրահում, Վինիսիուս Ժունիորն ու Արդա Գյուլերը մարզման որոշ հատվածն անցկացրել են խոտածածկին՝ ընդհանուր խմբի հետ:
«Ռեալն» առաջիկա կիրակի Լա լիգայի 6-րդ տուրում արտագնա հանդիպում կանցկացնի «Աթլետիկոյի» հետ: Բելինգեմի հնարավոր բացակայության մասին առայժմ տեղեկություն չկա:
Ջուդ Բելինգեմն այս ամռանն է միացել մադրիդյան թիմին Դորտմունդի «Բորուսիայից»: Նա 6 խաղում խփել է նույնքան գոլ:
