Թուրինի «Յուվենտուսը» պայմանագիր է համաձայնեցրել Ֆրանկֆուրտի «Այնտրախտի» հարձակողական ոճի կիսապաշտպան Ֆիլիպ Կոստիչի հետ։
Football Italia-ի հաղորդմամբ՝ իտալական ակումբը 29-ամյա ֆուտբոլիստին տարեկան մոտ 3 միլիոն աշխատավարձ կվճարի։ Հավելավճարներ նույնպես նախատեսված են։
Ավելի վաղ Կոստիչին ցանկանում էր թիմ հրավիրել Լոնդոնի «Վեսթ Հեմը», սակայն սերբ ֆուտբոլիստը նախապատվությունը տվել է թուրինյան ակումբին՝ Չեմպիոնների լիգայում խաղալու պատճառով։
«Յուվենտուսը» տրանսֆերի համար մոտ 13 միլիոն եվրո կվճարի գերմանական ակումբին։
2021/22 մրցաշրջանում Կոստիչը Բունդեսլիգայում մասնակցել է 31 խաղի, խփել 4 գոլ, կատարել 9 գոլային փոխանցում։ Transfermarkt-ը 24 միլիոն եվրո է գնահատում նրա տրանսֆերային արժեքը։


