Իրանի դատարանը մահապատժի է դատապարտել պրոֆեսիոնալ բռնցքամարտիկ Մոհամադ Ջավադ Վաֆաեի Սանիին 2019 թվականին երկրում բռնկված բողոքի ցույցերին մասնակցելու համար։
Տեղեկությունը հայտնել է ԱՄՆ-ում գործող Center for Human Rights in Iran (CHRI) իրանական իրավապաշտպան կազմակերպությունը։ Տեղեկությունը Twitter-ում հաստատել է մարզիկի փաստաբան Բաբակ Պակնիան։
Իրանում վառելիքի թանկացմամբ պայմանավորված բողոքի ցույցեր էին ընթանում 2019-ի նոյեմբերին։ Բռնցքամարտիկը ձերբակալվել է 2020 թվականի փետրվարին։
«Մոհամադ Ջավադ Վաֆաեի Սանին մահապատժի է դատապարտվել «ծանր հանցանքի» և 2019 թվականին դաժանաբար ճնշված բողոքի գործողությունների ընթացքում կառավարական շենքերի ենթադրյալ հրկիզման ու դրանք վնասելու մեղադրանքով»,- նշել է կազմակերպությունը։
Փաստաբանը մանրամասնել է, որ 26-ամյա մարզիկին դատապարտել են կախաղանի, սակայն դատավճիռը դեռ կարող է բողոքարկվել երկրի Գերագույն դատարանում։
Ֆրանսիական AFP գործակալությունն էլ, հղում կատարելով Փարիզում գործող Իրանի ազգային դիմադրության խորհրդին (NCRI), հաղորդում է, որ Վաֆաեի Սանին դատապարտվել է նաև Իրանում օրենքից դուրս հայտարարված «Ժողովրդական մոջահեդներ» ընդդիմադիր խմբին աջակցելու համար։
Դեռևս 2020 թվականին հակակառավարական ցույցերին մասնակցելու համար մահապատժի էր ենթարկվել հունահռոմեական ոճի ըմբշամարտի Իրանի չեմպիոն Նավիդ Աֆկարին։
