Միլանի «Ինտերը» և հռոմեական «Լացիոն» իտալական Ա սերիայի 2023/24 մրցաշրջանն ավարտեցին ոչ-ոքի արդյունքով։ Հռոմեական մյուս ակումբը` «Ռոման», վերջին խաղում պարտվեց։

Չեմպիոն «Ինտերը» վերջին` 38-րդ տուրում 2-2 խաղաց «Վերոնայի» հետ։ «Ներաձուրիից» դուբլի հեղինակ դարձավ ավստրիացի հարձակվող Մարկո Առնաուտովիչը։

Միլանյան ակումբի հայտացուցակում էր նաև Հայաստանի հավաքականի նախկին կիսապաշտպան Հենրիխ Մխիթարյանը, որն այդպես էլ դաշտ դուրս չեկավ։

Սիմոնե Ինձագիի գլխավորած թիմն առաջնությունն ավարտեց 94 միավորով, «Վերոնան» վաստակեց 38 միավոր և բարձրացավ 13-րդ տեղ։

«Լացիոն» վերջին խաղում տանը չկարողացավ հաղթել Ա սերիայից արդեն դուրս մնացած «Սասուոլոյին». հանդիպումն ավարտվեց 1-1 հաշվով։ Իգոր Տուդորի թիմը  նվաճեց Եվրոպա լիգայի ուղեգիր և 61 միավորով առաջնությունն ավարտեց 7-րդ տեղում։ «Սասուոլոն» հավաքել է միայն 30 միավոր և զբաղեցրեց նախավերջին` 19-րդ տեղը։

«Ռոման» հյուրընկալվելիս 1-2 հաշվով պարտվեց «Էմպոլիին»։ «Էմպոլին» հաղթական գոլը խփեց մրցավարի ավելացրած երրորդ րոպեին։ Այդ հաղթանակի շնորհիվ տոսկանական ակումբը վաստակեց 36 միավոր, շրջանցեց «Ֆրոզինոնեին», բարձրացավ 17-րդ տեղ և պահեց տեղն Ա սերիայում։ «Ֆրոզինոնեն» 35 միավորով զբաղեցրեց 18-րդ տեղը և լքեց ուժեղագույնների պայքարը։ 

«Ռոման» նույնպես կխաղա Եվրոպա լիգայում և 63 միավորով զբաղեցրեց 5-րդ տեղը։

Ա սերիա, 38-րդ տուր

«Վերոնա» - «Ինտեր»` 2-2 

Տիջանի Նոսլին, 16, Տոմաշ Սուսլով, 37 - Մարկո Առնաուտովիչ, 10, 45+1
«Էմպոլի» - «Ռոմա»` 2-1 

Մատեո Կանսելյերի, 13, Մ'Բայե Նիանգ, 90+3 - Հուսեմ Աուար, 45+1
«Լացիո» - «Սասուոլո»` 1-1 

Մատիա Ձականի, 60 - Մատիա Վիտի, 66