Անգլիայի հավաքականի նախկին ֆուտբոլիստ և մարզիչ Գլեն Հոդլը կարծում է, որ Արգենտինայի հավաքականի հարձակվող Լիոնել Մեսի միշտ կլինի լեգենդար ֆուտբոլիստ Դիեգո Մարադոնայի ստվերում, եթե չկարողանա հաղթել աշխարհի առաջնությունը:
«Ինձ համար Մարադոնան պատմության լավագույն ֆուտբոլիստն է: Նա ավելի ուժեղ էր, քան Մեսին, Կրիշտիանու Ռոնալդուն, Պելեն, Յոհան Կրոյֆը և ով ասես:
Կատարի աշխարհի առաջնությունը Մեսիի վերջին հնարավորությունն է հասնել Մարադոնայի մակարդակին, այլապես նա միշտ կլինի նրա ստվերում»,- Հոդլի խոսքը մեջբերում է Daily Star-ը:
35-ամյա Մեսին մասնակցում է 5-րդ աշխարհի առաջնությանը: Մարադոնան մասնակցել է 4 աշխարհի առաջնության, սակայն, ի տարբերություն ՊՍԺ-ի հարձակվողի, կարողացել է 1986 թվականին նվաճել չեմպիոնի տիտղոսը:
Երկու խաղերից հետո Արգենտինայի հավաքականը 3 միավորով երկրորդն է C խմբում և նոյեմբերի 30-ին կայանալիք վերջին տուրում ուժերը կչափի Լեհաստանի հավաքականի հետ:
