Իսպանացի մասնագետները Կադիսի շրջակայքում հայտնաբերել են հեղեղված ավերակներ, որոնք, ենթադրաբար, կարող են պատկանել փյունիկյան աստծո Մելքարտի լեգենդար տաճարին, որին հռոմեացիները նույնացրել են Հերկուլեսի հետ. հայտնում է Diario de Cadiz թերթը:
Հերկուլեսի տաճարը Հադեսի (Կադիսի հնագույն անվանումը) հնության ամենահայտնի սրբավայրերից էր: Նրա մասին գրել են Ստրաբոնը և Փիլոստրատը: Ըստ Սվետոնիուսի՝ հենց այս տաճարում է Հուլիոս Կեսարը տեսել Ալեքսանդր Մակեդոնացու արձանը, որից հետո որոշել է իր կյանքը նվիրել մեծ գործերի իրականացմանը: Սակայն մինչ օրս այս շենքի հետքերը հայտնի չեն:
Ավերակները հայտնաբերվել են Սան Ֆերնանդո և Չիկլանա մունիցիպալիտետների միջև գտնվող Կանո դե Սանկտի Պետրի ջրանցքի գետաբերանում: Սա 150 մետր երկարությամբ և 300 մետր լայնությամբ մոնումենտալ շինություն է:
Ինչպես նշվեց, գտածոն հնարավոր է դարձել հնագույն աղբյուրների և նախկին հնագիտական հայտնագործությունների համեմատության շնորհիվ «տարածքի թվային մոդելի» տվյալների հետ, որը ստեղծվել է Աշխարհագրության ազգային ինստիտուտում՝ օդային լուսանկարչության միջոցով:
Հերկուլեսի տաճարի հայտնաբերման վարկածը հաստատելու համար կպահանջվի հետագա հնագիտական հետազոտություն, ինչպես ցամաքում, այնպես էլ ջրի տակ, ինչպես նաև հատուկ երկրահնագիտական վերլուծություն, որը կլրացվի պալեոէկոլոգիական նմուշների ընտրությամբ:
