FastNews-ը նախորդ հրապարակման մեջ անդրադարձել էր ֆուտբոլային երկարակեցությամբ աչքի ընկած, Հայաստանի Բարձրագույն խմբի առաջնություններում 15 և ավելի մրցաշրջան անցկացրած ֆուտբոլիստներին: Իսկ ինչպիսի՞ն է իրավիճակը լեգեոնականների մոտ: Նրանց մեծամասնությունը սովորաբար կարճ ժամանակահատված անցկացնելով Հայաստանում, հեռացել է: Սակայն լեգեոնականների մեջ էլ կան ֆուտբոլիստներ, որոնք երկար տարիներ հանդես են եկել հայկական ակումբներում:

Այլազգի ֆուտբոլիստներից յուրօրինակ ռեկորդակիրն Անատոլի Այվազովն է, որը 11-րդ մրցաշրջանն է անցկացնում Հայաստանում: Ռուս դարպասապահն ընթացիկ առաջնության աշնանային հատվածում «Վեստ Արմենիայում» էր, իսկ օրերս տեղափոխվել է «Վան», որը նրա ֆուտբոլային կարիերայում կլինի հայկական 7-րդ ակումբը:

Անատոլի Այվազովը Հայաստանում ֆուտբոլային կարիերան սկսել է «Փյունիկում»՝ նորամուտը նշելով 2014թ. սեպտեմբերի 13-ին «Արարատի» հետ կայացած 5-րդ տուրի խաղում: Նորամուտը հաջող ստացվեց: 18-ամյա դարպասապահը դարպասն անառիկ պահեց, իսկ նրա թիմակիցները 4 գոլ խփեցին: ««Փյունիկի» նորեկը մինչև առաջնության ավարտն առանց փոխարինման պաշտպանեց թիմի դարպասը՝ անցկացրած 24 հանդիպումներում բաց թողնելով նույնքան գնդակ: Այդ խաղերից 10-ում նա դարպասն անառիկ պահեց: Այվազովին հաջողվեց դարպասը 327 րոպե շարունակ անառիկ պահել ու տարիքային ռեկորդ սահմանել, ինչը մինչև օրս չի գերազանցվել:

«Փյունիկի» կազմում անցկացրած առաջին մրցաշրջանը շատ հաջող էր Այվազովի համար, որը թիմակիցների հետ նվաճեց ՀՀ չեմպիոնի և գավաթակրի տիտղոսները: Հաջորդ մրցաշրջանում Այվազովը «Փյունիկում» դարձավ Հայաստանի սուպերգավաթակիր և առաջնության բրոնզե մրցանակակիր՝ 12 խաղում բաց թողնելով 11 գնդակ, 4 անգամ դարպասը պահելով անառիկ:

Առաջնության ավարտից հետո տեղափոխվելով «Շիրակ», Անատոլի Այվազովը 2 մրցաշրջաններում էլ հուսալիորեն պաշտպանեց գյումրեցիների դարպասը՝ հանդիսանալով թիմի հիմնական դարպասապահը:

Հետագա տարիներին խաղալով «Ուրարտուի», «Նոայի», «Ալաշկերտի» և «Վեսթ Արմենիայի» կազմերում, Այվազովն ավելի քիչ խաղաժամանակ է ստացել՝ չլինելով հիմնական դարպասապահը: Օրինակ, ընթացիկ առաջնության մեկնարկային 2 խաղերից հետո Այվազովն իր տեղը դարպասում զիջել է Անդրիա Դրագոևիչին:

«Փյունիկի» և Հայաստանի ազգային հավաքականի կիսապաշտպան Սոլոմոն Իմե Ուդոյի համար ընթացիկ առաջնությունը հոբելյանական՝ 10-րդն է: Նիգերիացի կիսապաշտպանը Հայաստանում հայտնվեց 2015թ. ամռանը՝ ընդգրկվելով նախորդ առաջնության արծաթե մրցանակակիր «Ուլիսի» կազմում: Սակայն առաջնության աշնանային հատվածի ավարտից հետո «Ուլիսը» լուծարվեց, որի պատճառով Ուդոն գարնանը ելույթները շարունակեց «Շիրակում»:

Գյումրեցիների կազմում 2,5 մրցաշրջան խաղալու ընթացքում նիգերիացի ֆուտբոլիստը թիմակիցների հետ դարձավ Հայաստանի գավաթակիր ու սուպերգավաթակիր, մեկական անգամ էլ արժանացավ արծաթե և բրոնզե մեդալների:

 

Հաջորդ մրցաշրջանում Ուդոն տեղափոխվեց «Ուրարտու», որի կազմում իր երկրորդ բրոնզե մեդալը նվաճեց և առաջնության ավարտից հետո վերադարձավ «Շիրակ»: 2020/21թթ. առաջնությունը Հայաստանի հավաքականի կիսապաշտպանը շիրակցի իր մի խումբ թիմակիցների հետ դիմավորեց «Արարատում», որի կազմում մասնակցելով աշնանային հատվածի հանդիպումներին, մեկնեց Ղազախստան:

Կարագանդայի «Շախտյորում» և «Ատիրայուում» խաղալուց հետո Ուդոն 2021/22թթ. առաջնության գարնանային հատվածն անցկացրեց «Արարատ-Արմենիայում», որի կազմում հաջորդ մրցաշրջանում էլ խաղալուց հետո կրկին կարճ ժամանակով մեկնեց Ղազախստան՝ ընդունելով «Կասպիի» հրավերը:

Հայաստանյան կարիերայում նիգերիացի ֆուտբոլիստն առայժմ իր ամենամեծ հաջողությանը հասել է «Փյունիկում»՝ նախորդ մրցաշրջանում թիմակիցների հետ արժանանալով չեմպիոնի ոսկե մեդալի: Ընթացիկ առաջնության մասնակիցներից Ուդոն Fastex Պրեմիեր լիգայում բոլորից շատ խաղ (202) անցկացրած այլազգի ֆուտբոլիստն է: Նա եզրափակում է Հայաստանի առաջնությունների ամենափորձառու այլազգի ֆուտբոլիստների եռյակը՝ զիջելով միայն բրազիլացի Ալեքս Էնրիկե դա Սիլվային (230) և կոլումբիացի Վբեյմար Անգուլոյին (214): Վերջիններս Հայաստանում 9 մրցաշրջան են անցկացրել՝ հանդես գալով նաև ՀՀ ազգային հավաքականում:

Ալեքս Էնրիկե դա Սիլվան 2006թ. Հայաստանում իր մի քանի հայրենակիցների հետ միասին հայտնվեց Բրազիլիայում Արկադի Անդրեասյանի կատարած սելեկցիոն աշխատանքի արդյունքում: Բրազիլացի պաշտպանը մինչև վերջ հավատարիմ է մնացել «Միկային»՝ իր համար հարազատ դարձած թիմի մարզաշապիկով խաղադաշտ դուրս գալով 2006-2014/15թթ. առաջնություններում:

Նա ոչ միայն հիանալի էր կատարում իր հիմնական խաղային պարտականությունները, այլև արդյունավետ էր գործում թիմի գրոհներին միանալիս՝ դառնալով 36 գոլի հեղինակ: Այդ ցուցանիշով Ալեքսը «Միկայի» ամենաարդյունավետ այլազգի ֆուտբոլիստն է: Նա նաև թիմի ռեկորդակիրն է ՀՀ առաջնություններում անցկացրած խաղերի քանակով (230):

Վբեյմար Անգուլոն Հայաստանում ելույթները սկսել է 2015թ. օգոստոսին՝ միանգամից իր հաստատուն տեղն ամրագրելով «Գանձասար-Կապանի» հիմնական կազմում: Երբ 2020թ. աշնանը «Գանձասար-Կապանը» դադարեցրեց իր ելույթներն առաջնությունում, կոլումբիացի ֆուտբոլիստը տեղափոխվեց «Արարատ-Արմենիա», որտեղ 1,5 մրցաշրջան խաղալուց հետո նույնքան ժամանակահատվածում հանդես եկավ «Ալաշկերտում»:

Հայաստանում 8-րդ մրցաշրջանն է անցկացնում Օգնյեն Չանչարևիչը: Սերբ դարպասապահը ՀՀ առաջնություններում «Ալաշկերտի» դարպասը սկսել է պաշտպանել 2017/18թթ. առաջնության գարնանային հատվածից՝ նորամուտը նշելով 2018թ. փետրվարի 28-ին Երևանում «Շիրակի» հետ կայացած առաջնության խաղում: «Ալաշկերտում» իր առաջին մրցաշրջանում Չանչարևիչը 13 հանդիպումներում նույնքան գոլ բաց թողեց, 5 անգամ դարպասը պահեց անառիկ:

2023թ. ձմռանը փորձառու դարպասապահը տեղափոխվեց «Նոա»՝ իր հուսալի խաղով նպաստելով թիմի հաջող մրցելույթներին թե առաջնությունում, թե եվրագավաթներում, միաժամանակ հանդիսանալով Հայաստանի ազգային հավաքականի հիմնական դարպասապահը:

Օգնյեն Չանչարևիչը հայկական թիմերի դարպասապահներից միակն է, որ եվրագավաթներում գոլի հեղինակ է դարձել: Նա Հայաստանի առաջնություններում բոլորից շատ խաղ (183) անցկացրած և դարպասն առավել հաճախ (69 անգամ) անառիկ պահած այլազգի դարպասապահն է, տարիքային մի քանի ռեկորդների հեղինակ է:

Ընթացիկ առաջնության մասնակիցներից Ալեքսանդր Գլիշիչը 7-րդ մրցաշրջանն է անցկացնում Հայաստանում, Յուսուֆ Օտուբանջոյի, Խամես Սանթոսի, Խուան Բրավոյի, Միխայիլ Կովալենկոյի և Սերգեյ Վակուլենկոյի համար առաջնությունը 6-րդն է:

FastNews-ը ներկայացնում է Հայաստանում 6 և ավելի մրցաշրջան անցկացրած այլազգի ֆուտբոլիստների ցանկը:

Ֆուտբոլիստներ	Մրց.	Թիմ	Խաղ	Թվական
1.Անատոլի Այվազով	11	6	135	2014/15-2024/25
2.Սոլոմոն Իմե Ուդո	10	6	202	2015/16-2024/25
3.Ալեքս դա Սիլվա	9	1	230	2006-2014/15
4.Վբեյմար Անգուլո	9	3	214	2015/16-2023/24
5.Օգնյեն Չանչարևիչ	8	2	183	2017/18-2024/25
6.Վսևոլոդ Երմակով	7	4	171	2016/17, 2018/19-2023/24
7.Գագա Թբիլաշվիլի	7	4	165	2005-2011թթ.
8.Նոա Կասուլե	7	3	150	2007-2013/14
9.Մարկո Պրլևիչ	7	2	143	2016/17-2022/23
10.Թենգիզ Ուգրեկելիձե	7	1	140	2007-2013/14
11.Ուրոշ Նենադովիչ	7	4	124	2016/17-2022/23
12.Գորան Օբրադովիչ	7	4	113	2009, 2011-2015/16, 2017/18
13.Ալեքսանդր Գլիշիչ	7	4	94	2018/19-2024/25
14.Դավիթ Խուրցիձե	6	4	164	2014/15, 2019/20-2023/24
15.Դիդիե Բորիս Կադիո	6	3	133	2012/13-2013/14, 2017/18, 2020/21-2022/23
16.Յուսուֆ Օտուբանջո	6	2	133	2019/20-2024/25
17.Խամես Սանթոս	6	4	132	2019/20-2024/25
18.Մարկոս Պիզելի	6	2	128	2006-2011
19.Աննան Մենսահ	6	4	126	2018/19-2023/24
20.Ջոնել Դեսիրե	6	4	121	2018/19-2023/24
21.Խուան Բրավո	6	3	114	2019/20-2024/25
22.Ռենատո դե Մորայես	6	3	110	2004-2008, 2011
23.Միխայիլ Կովալենկո	6	2	107	2019/20-2024/25
24.Էդվարդ Կպոդո	6	4	98	2014/15-2019/20
25.Սերգեյ Վակուլենկո	6	2	88	2019/20-2024/25