Ֆրանկոֆոնիայի մշտական խորհուրդը միաձայն որոշել է 2027 թվականի Ֆրանկոֆոնիայի մարզական խաղերի անցկացման իրավունքը շնորհել Երևանին, հայտնում է Հայաստանի Կառավարության մամուլի ծառայությունը:

Սպասվում է, որ խաղերին մասնակցելու համար Հայաստանի մայրաքաղաք կժամանեն 50-ից ավելի երկրների շուրջ 4000 մարզիկներ:

Հիշեցնենք, որ 2023 թվականի դեկտեմբերի 14-ին Հայաստանի վարչապետի աշխատակազմի ղեկավար Արայիկ Հարությունյանը Ֆրանսիայի մայրաքաղաք Փարիզում հանդիպել էր Ֆրանկոֆոնիայի միջազգային կազմակերպության գործադիր տնօրեն Կարոլին Սենթ Իլերի հետ և քննարկել 2027 թվականի Ֆրանկոֆոնիայի խաղերն ընդունելու նպատակով Հայաստանի ներկայացրած հայտը: Նախորդ տարվա դեկտեմբերի 15–ին Հարությունյանի գլխավորած պատվիրակությունը Ֆրանկոֆոնիայի միջազգային կազմակերպության կենտրոնակայանում մասնակցել էր ՖԽՄԿ կողմնորոշիչ խորհրդի նիստին, որի ընթացքում նույնպես քննարկվել էր Հայաստանի ներկայացրած հայտը։

Ֆոտո՝ ՀՀ Կառավարության մամուլի ծառայություն