Շախմատի միջազգային ֆեդերացիան (ՖԻԴԵ) հրապարակել է շախմատիստների ամենամսյա դասակարգման աղյուսակը։
Տղամարդկանց դասակարգման աղյուսակը շարունակում է գլխավորել աշխարհի 16-րդ չեմպիոն Մագնուս Կառլսենը (Նորվեգիա, 2840 վարկանիշ)։
Լավագույն հնգյակում են նաև Հիկարու Նակամուրան (ԱՄՆ, 2810), Ֆաբիանո Կարուանան (ԱՄՆ, 2795), Վինսենթ Կեյմերը (Գերմանիա, 2776) և Արջուն Էրիգայիսին (Հնդկաստան, 2775)։
Դասական շախմատի աշխարհի գործող չեմպիոն Դոմարաջու Գուկեշը 2754 վարկանիշով միայն 10-րդն է։
Հայաստանի հավաքականի նախկին առաջատար, այժմ ԱՄՆ-ն ներկայացնող Լևոն Արոնյանը 20-րդ տեղում է և ունի 2729 վարկանիշ։
Տղամարդկանց լավագույն 100 շախմատիստների թվում Հայաստանն ունի միայն մեկ ներկայացուցիչ. Շանթ Սարգսյանը 2665 վարկանիշով 52-րդն է։
Կանանց դասակարգման աղյուսակում Էլինա Դանիելյանը (2408) 37-րդն է, Լիլիթ Մկրտչյանը (2366)` 75-րդը, իսկ Մարիամ Մկրտչյանը (2353)` 90-րդը։
